Gion Antoni Derungs – Missa pro defunctis
Durant sia vita ha Gion Antoni Derungs scrit tschintg messas, l'emprima l'onn 1974, la «Missa pro defunctis». Igl è in'ovra per chor a cappella cun set parts (Requiem / Kyrie / Requiem aeternam / Domine Jesu Christe / Sanctus / Agnus Dei / Lux eterna) che sa basan sin il text liturgic. Igl è in'ovra che fascinescha era il dirigent e musicist Clau Scherrer. Tenor el imiteschia Gion Antoni Derungs cun questa musica in'orgla baselgia. I saja interessant ch'el haja imità in'orgla e laschia chantar la messa senza l'orgla. Qua pudais tadlar l'entir discurs cun Clau Scherrer:
A chaschun dal Gion Antoni Derungs festival il settember 2022 ha l'Ensemble vocal Origen preschentà la messa da mort en la baselgia son Martin a Cuira. Clau Scherrer ha dirigì. Er collavurà al concert ha l'organist Tobias Willi.
Il mais dals morts, la liturgia da Numnasontga e Di da las olmas u era la dumengia dals morts en la baselgia evangelic-refurmada ha adina puspè animà cumponistas e cumponists da scriver ovras per quest temp. In da quels è Joachim Raff.
Joachim Raff – De profundis
L'ovra sa basa sin il psalm 130 («Ord la profunditad clom jau tar tai, Signur») che tutga tar ils psalms da ricla ed è in'oraziun da morts tradiziunala. Il 1867 ha il cumponist tudestg ch'è creschì si en Svizra scrit in'ovra expressiva davart quest psalm, il «De profundis». Quella consista da sis parts: Andante / De profundis / Si iniquitates / Quia apud te / A custodia / Et ipse rediment.
En l'Artg musical sunan e chantan il Göteborgs Operaorkester ed il Karlstadt Kammarkör questa grondiusa ovra. Dasper èn era d'udir ulteriuras ovras sacralas da Joachim Raff.
