Durant ils onns 1970 ha il musicist, oriund da San Murezzan absolvì il seminari da magistras e magisters a Cuira. Durant questa scolaziun è el vegnì en contact cun varsaquantas persunas che sa muventavan en il mund da la cultura e da la musica – in mund che ha immediat fascinà er el. Suenter avair fatg il diplom da magister primar ha el perquai decidì d'ir a studegiar musica. Sa decider per ina suletta direcziun fiss stà difficil per el. Uschia ha Peter Appenzeller studegià musica da scola, musica da baslegia ed era clavazin.
Jau sun ensatgi che sto avair differentas chommas»
Suenter ses studis da musica è Peter Appenzeller sa domicilià cun sia famiglia en il chantun Turitg. Tuttina è el adina era s'interessà e s'engaschà ferm per il mantegniment ed il svilup da la cultura da ses chantun da derivanza. Uschia ha el pudì prender en consegna l'onn 2012 in premi da renconuschientscha dal chantun Grischun.
Grazia al chantun Grischun e las persunas che lavuran qua hai jau pudì viver mia musicalitad.
Sia lavur sco dirigent
Sper il chor maschadà «Cantaurora» sco era il «Freier Chor Zürich», il «Coro Cantus» en l'Italia ed era blers auters projects da chant, ha Peter Appenzeller tranter auter dirigì era la «Ligia Grischa». In extract ord l'archiv RTR mussa il cumenzament da questa era:
Cumponer – in'ulteriura passiun
Sper ses engaschi sco dirigent, pedagog da musica en differentas scolas sco era mentur da differents projects da chant e musica è Peter Appenzeller era cumponist.
Peter ha in grond dun da metter pleds en musica. Per mai èn ses messadis adina stads fitg enclegentaivels.
Sia creaziun cumpositorica che cuntegna cunzunt musica vocala va da chanzuns d'uffants fin tar numerusas chanzuns per chor maschadà u era per vuschs egualas. Tar ina gronda part da sia ovra sa tracti da chanzuns cun texts rumantschs. Principalmain ha el collavurà cun l'autur engiadinais, Alfons Clalüna. Sia marca sco cumponist: ristgar d'experimentar e procurar uschia per ulteriuras colurs entaifer il grond stgazi da chanzuns en la Rumantschia.
Or da l'archiv:
