Nadal – in oratori
L'istorgia dal uffant ch'è naschì a Bethlehem en ina stalla, sper in bov ed in asen, è in dals texts ils pli impurtants da la religiun cristiana. La tematica vegn duvrada en numerusas ovras da divers cumponists e scrivents. Ovras sco «Weihnachtsoratorium» da Johann Sebastian Bach u «Die Weihnachtsgeschichte» da Hugo Distler vegnan manadas si mintg'onn. Il 2007 ha il dirigent dal Chor mischedau Schluein da lura, Armon Ulber, gi l'idea da crear in text modern da Nadal cun parallelas al temp actual. Cler era per el ch'i stoppia esser in text rumantsch ed ina cumposiziun per in chor dal conturn e cun instruments da sturs.
Armon Ulber ha prendì si contact cun Roman Weishaupt per dumandar el da scriver in text che sa basa sin l'istorgia da Nadal biblica, ch'è pero in zic pli modern. Lez ha gugent dà suatientscha ed ha fatg sias ponderaziuns. El ha era gì contact cun il teolog Ursicin Gion Geli Derungs. Scrit haja el savens durant il viadi en il tren tranter Cuira e Turitg, ha ditg Weishaupt. El vuleva scriver in text ord ina perspectiva dramatica, ord la vista da quai ch'è capità en quest temp e da quai che na stat betg scrit en la Bibla.
L'incumbensa per scriver la musica ha Armon Ulber surdà a Peter Appenzeller. El ha gì da cumponer vitiers ina musica adattada, musica varionta per chor maschadà, musica instrumentala e paucs solists. Ina sfida, sco el conceda, pertge el scriva uschiglio litteratura be per chors.
Il Chor mischedau Schluein (dir. Armon Ulber) ensemen cun la Societad da musica Falera (dir. Duri Cathomen) han mess en pè il project e realisà quel da Nadal 2008. Er collavurà han Silvia Matile-Eggenberger (sopran) e Georg Fluor (tenor) e vid l'orgla Anna Maria Schlosser. Il libretist Roman Weishaupt ha fatg la rolla dal pledader.
La registraziun è dal concert dals 20 da december 2008 en La Fermata a Falera.
Oratori: Weissagung und Erfüllung
Il cumponist da l'ovra, Hans Huber, che vegn er numnà «Brahms da la Svizra», è mort da Nadal 1921. El era l'emprim cumponist svizzer ch'è rut or da la stretga helvetica per stgaffir in'ovra da la romantica tardiva. El ha scrit nov sinfonias (sco Beethoven e Bruckner), operas, concerts per clavazin, musica da chombra ed ovras vocalas, tranter questas trais oratoris. L'impurtant oratori da Hans Huber è segiramain «Weissagung und Erfüllung». Tar quest'ovra ha el collavurà stretgamain cun Elisabeth Speiser-Sarasin, la segunda dunna dal cusseglier guvernativ e cusseglier naziunal da Basilea Paul Speiser-Sarasin. Ella ha elegì ils texts biblics e Huber ha mess quels en musica, en tut ha l'ovra nov parts. La primaudiziun è stada ils 6 da december 1913 en il Münster a Basilea sut la direcziun da Herman Suter.
Dal cuntegn anora è l'oratori ina sort cantata da Nadal, la scena dal pursepen (stalla da Nadal) è pero sursiglida. Da l'annunzia da la naschientscha dal Salvader va il text directamain tar ils trais sabis da l'Orient.
Ils interprets èn: Sinfonieorchester Basel, Basler Gesangsverein, Basler Madrigalisten, Knabenkantorei Basel, Maya Boog (sopran), Eva Vogel (mezzosopran), Benjamin Bruhns (tenor), Michael Nagy (bariton) e Christian Schmitt a l'orgla. Dirigent è Duncan Ward.
Igl è in concert dals 20 d'avust 2022 en il Stadtcasino a Basilea. Per tadlar suenter stat il concert a disposiziun fin 60 dis suenter il datum d'emissiun.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
