Bach: «Oster-Oratorium»
L'oratori da Pasca (BMV 249, D-Dur) da Johann Sebastian Bach ha gì sia primaudiziun la dumengia da Pasca il 1725. Da l'ovra existan trais differentas versiuns posteriuras cun midadas remartgablas en repartiziun e text. Auter che tar ils ulteriurs oratoris da Bach na vegn il text dals evangelists en quest oratori betg purtà avant pled per pled sco scrit en la bibla mabain a moda libra.
Ils protagonists dal «Oster-Oratorium» èn Maria Magdalena (alt), Maria Jacobi (sopran), Petrus (tenor) e Giusep (bass). Suenter che Maria Magdalena ha inscuntrà Jesus ch'è levà da mort en vita ha ella raquintà quai a ses giuvnals (al cumenzament da l'emprim recitativ). Lezs van dabot tar la fossa e vesan ch'ella è vida («Kommt, eilet und laufet, ihr flüchtigen Füsse. Erreichend die Höhle, de Jesum bedeckt!»). L'oratori ha 11 parts, cumenza cun ina sinfonia e va a fin cun il chor che chanta «Preis und Dank».
Mahler: Sinfonia nr. 2 «Auferstehung»
Gustav Mahler ha creà cun sia segunda sinfonia in'ovra ordvart majestusa e pompusa ed era innovativa. Usitadamain ha ina sinfonia quatter parts, Mahler ha dentant fatg tschintg. L'emprima part è ina celebraziun da morts me la tschintgavla è la lavada (resurrecziun). Tranter questas duas parts monumentalas datti la secunda (Andante comodo), la terza (In ruhig fliessender Bewegung) e la quarta è schizunt ina chanzun («Urlicht»).
Per l'entira sinfonia ha Mahler dovrà plirs onns, dal 1888 fin il 1894. Il settember 1888 aveva el gia terminà l'emprima part «Totenfeier». Il dirigent Hans von Bülow ha dentant crititgà fermamain questa part cura che Mahler ha sunà avant ella ad el. Sia motivaziun era franada ed el ha mess da la vart la sinfonia, dentant betg mo pervi da la critica da Hans von Bülow. El ha gì blera lavur sco nov dirigent da l'opera da Hamburg nua ch'el aveva radund 120 concerts per stagiun. Temp per cumponer aveva el be durant las vacanzas da stad. En quellas è el sa deditgà a la collecziun da poesias «Des Knaben Wunderhorn» da Achim von Arnim e Clemens Brentano. 12 da questas poesias ha el mess en musica sco chanzuns e duas da las chanzuns ha el prendì per sia segunda sinfonia. En la segunda part dovra Mahler dentant be la versiun instrumentala da la chanzun «Des Antonius von Padua Fischpredigt». Tut auter la quarta part. Per lezza piglia el la chanzun «Urlicht» per mezzosopran. Igl è l'emprima giada en l'istorgia da musica ch'in cumponist ha prendì ina chanzun cumpletta sco part d'ina sinfonia.
Ditg ha mancà a Mahler in'idea briglianta per la fin. E quella è vegnida sco in chametg ord tschiel blau. Al servetsch divin da commemoraziun da la mort da Hans von Bülow (29 da mars 1894 en la baselgia St. Michaelis, Hamburg) ha Mahler l'idea scheniala. Sco resposta sin la «Totenfeier» en l'emprima part da la sinfonia poi dar be la «Auferstehung» sco resposta. Ed uschia scriva Mahler a fin sia segunda sinfonia.
La primaudiziun diregia Gustav Mahler sez ils 13 da december 1895 a Berlin.
La partitura originala da la sinfonia nr. 2 da Mahler è vegnida ingiantada il 2016 per 5,3 milliuns euros tar Sotheby's.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
