«aura» è la quarta schiba ch'il chantautur da 28 onns publitgescha. Ella cuntegn 10 chanzuns cun be curts titels – adequat al musicist che n’è betg in dals gronds pleds. I cumenza cun ina sort snippet (in curt toc musica cun passaschas da chanzuns novas sco prevista avant la publicaziun). En quest cas è «mument» dentant ina prevista sin quai che spetga sin l’album: la vusch da Mattiu en il center, musica sferica e reducida, rasadas da tuns cun blera natiralezza e paucs elements artifizials.
In'invista
Per Mattiu ha mintga chanzun in’istorgia. Per exempel haja el scrit «present» cura ch’el haja realisà ch’el saja savens traplà tranter il passà ed il futur. La chanzun duaja far endament ad el ch’el vivia en l'uss, en quest mument. En «plova» sa regorda el d'ina expressiun da ses tat «Quai faschain nus lura, cura ch'i plova...». Ord da questa construcziun ha el creà ina chanzun cun il messadi da betg pli tardivar mabain nizzegiar ils muments ch’enritgeschan la vita.
La chanzun «aura» che dat il titel a l’album haja duvrà blera pazienza. L’emprima idea è stada da realisar quella cun in chor. Insatgi da ses team haja proponì da far quai cun sia famiglia. Ensemen cun lezza en il studio saja la chanzun daventada la pli persunala fin oz.
Adina puspè enavos en la natira
Il fil cotschen che sa tira atras la musica e la vita da Mattiu è la natira. Saja quai cun pestgar, ir a chatscha ubain sco tematica ed inspiraziun en sias chanzuns. Quai è era il cas en l’album «aura». Uschia na fai betg smirvegliar ch'il cover da l'album mussa in prà alpin cun in spievel che reflectescha in culm en la brentina.
Las chanzuns èn savens introspectivas, bunamain filosoficas, ruassaivlas cun in tarpun musical natural – instruments sco ghitarra e clavazin èn sper la battaria decenta protagonists principals. Sco usità ils ultims onns da Mattiu è l’album producì bain – a l’entschatta durant duas emnas en ina chasa a Rumein e lura per las ultimas glimadas a Berlin e Turitg.
Musica per il bainesser
Mattiu fa era sin «aura» musica per sa sentir bain, musica patgifica che stgauda il cor. Il redactur da musica da RTR descriva l'album sc'ina rasada da maila. Ins po prender differenta maila, in’autra pasta, metter si dapli u pli pauc zutger, duvrar chanella... Tut quai gusta bain e fa plaschair – la finala èsi dentant anc adina ina rasada da maila, era sch'ella è buna. Pia in album da buna qualitad sco usità da Mattiu che vess dentant profità dad ina u l’autra surpraisa.
Turnea en Germania ed Ollanda
L’onn ha cumenzà per Mattiu cun ina turnea en differents lieus en Germania cun il final a l’Eurosonic festival a Groningen. Là, preferidamain durant concerts pitschens ed intims, possa el preschentar la lingua rumantscha, sia cultura e la patria Surselva. Ord quai intent mussa el era adina fotografias da las cuntradas da sia patria durant ils concerts.