A Londra en il Hyde Park ha Fiona Fiasco observà in um a chaval. En ses patratgs ha ella abstrahà quella scena e cumbinà quella cun la colur blaua. Blau sco l’enconuschenta gruppa americana «Blue Man Group», dentant era blau sco simbol per la melanconia. Quai ha inspirà ella tar il text da la chanzun «Blue Rider, Blue Faced» che dat era il titel a l’EP.
Sche mia EP fiss in film lura fissi in film davart l’amur, dentant era dal esser persul cun elements surreals.
Sper quella chanzun èsi da chattar tschintg chanzuns sin l’EP da debut da Fiona Fiasco. L’estetica da la EP, il stil da las chanzuns, tar las fotografias da l’artista, il cover e booklet fin tar videos derasa ina nostalgia d’in temp passà che fa endament ils onns 70 ed 80 ch'è per part in zic inquietant e melanconic.
In’estetica che ha gia daditg fascinà la chantautura. Perquai èsi stà impurtant per ella da crear bler en atgna reschia – betg be las chanzuns.
Musica cun maletgs
Las chanzuns da Fiona Fiasco n'èn betg «be» musica. I na cuntegn betg be chant ed instruments. Ella entaissa era ramurs ed atmosferas en sias melodias. Uschia audan ins tranteren fin utschels che chantan, il vent che schuschura u era ina sunaria da vent che procura per in’atmosfera medemamain tranquila sco era inquietanta.
Era cun la vusch e divers instruments vegn ella da crear chanzuns che savessan exact uschia bain esser chanzuns per il soundtrack d’in film.
Influenzas
Quai che dat en egl: Tuttas chanzuns èn englaisas. Quai saja dentant betg stà ina decisiun conscienta mabain saja simplamain sa dà uschia. La chantautura che ha pli baud era gia scrit e publitgà chanzuns rumantschas vesa qua oravant tut dus motivs.
Per ina discurria ella en ses mintgadi per il mument pli pauc rumantsch. Ella abitescha a Turitg ed ha il 2025 passentà in temp a Paris. Per l’autra è ella stada inspirada dal gener «americana» da folk englais, western e country – geners cun fitg blera musica englaisa. Ella na vul dentant betg be scriver chanzuns en quella lingua – quai sajan fasas e sa midia da chanzun s chanzun.
«Blue Rider, Blue Faced» n’è betg mainstream e betg per in e scadina. Igl è ina EP sin la quala ins sto sa laschar en. Sper la vusch fina per part bunamain sferica da Fiona Fiasco èsi da chattar ina u l’autra surpraisa en furma da la instrumentalisaziun e da l’absenza d’elements electronics sco era cun diversas ramurs. Uschia creescha ella singulas scenas per il «film» ch’è sia EP.