L'inscunter grischun da chapellas è ina istorgia da success – ed in dals eveniments ils pli impurtants per tut ils amis e las amias da la musica populara. Cumenzà aveva tut ils 9 da schaner 1965 en il Marsöl a Cuira, clamà en vita da Hans Niederdorfer. Pli tard è l'eveniment vegnì dischlocà en il Forum Landquart ord motivs da plazza.
Quest onn è l'occurrenza vegnida organisada per la 60avla giada. Era l'ediziun da giubileum ha gì lieu en il Forum Landquart. E quai era cun RTR, che ha registrà tun e maletg da tut las producziuns.
14 furmaziuns han preschentà in vast program
La part tradiziunala
La saira funcziuna uschia che mintga furmaziun sa preschenta en furma concertanta e suna dus tocs. A la fin da la saira sa radunan lura tut las chapellas participantas sin tribuna per lura sunar communablamain ils tocs generals. Quai è in vair spectacul tut aparti! Ina tribuna fullanada cun musicantas e musicants, bain organisà e partì si en registers tenor orgelins, clarinettas e giuns.
Program spezial cun ina saira da saut
A chaschun da l'ediziun d'anniversari ha quai dà in u l'auter punct da program in pau auter che uschiglio. Numnadamain ina sairada da saut ch'ha gì lieu il venderdi saira. La «LEnglerkapellä», il «Ländlertrio Tänzig» e la furmaziun «Echo vom Kontrabass-Shop» han envidà a ballarinas e ballarins da ristgar ina u l'autra trestga.
Trais furmaziuns cun in program da saut