Inscunter da chapellas
L'entschatta da l'onn datti l'inscunter da chapellas a Landquart, quest onn gia per la 60avla giada. Quest inscunter è l'emprim highlight musical da l'onn nov e cunquai ch'igl è l'ediziun da giubileum datti er in program spezial. En l'Artg musical raquinta il producent da musica Flavio Tuor da quai ch'è planisà.
Bienna 2026
Quest inscunter tradiziunal è in da plirs puncts culminants ord vista musicala che spetgan il 2026. Er sch'i dat en il Grischun naginas festas da chant u festas da musica districtualas u chantunalas datti tuttina festas, giubileums, instrumentaziuns u forsa unifurmaziuns. A Bienna è la festa federala da musica, in'occurrenza cun in nov record da participaziun: 550 societads da musica (13 dal Grischun) cun radund 22'000 musicantas e musicants. RTR dastga far la producziun da video da la concurrenza da marschar er grazia a las experientschas rimnadas a la festa da musica chantunala a Claustra il 2024.
Claustra 2024
Registraziuns da RTR
Dapi l'onn 2023 porscha RTR a chors, societads da musica e furmaziuns da musica populara la chaschun da far registraziuns da tun e maletg. Cumenzà avain en baselgia a Flem ed en sala plurivalenta a Zernez, l'onn 2024 a Savognin e l'onn 2025 a Meierhof/Sursaissa. Quest onn s'installescha l'equipa tecnica da RTR a Lai en la sala culturala. Danovamain nizzegian 16 furmaziuns la purschida. La dumonda era però danovamain pli gronda uschia che nus avain deplorablamain era questa giada stuì far ina selecziun.
Registraziuns Sursaissa 2025
