Bleras societads da musica engiadinaisas na sa participeschan betg a la Festa federala da musica 2026 a Bienna. Perquai dat in project maun als musicants e las musicantas ch'èn interessadas d'ir a la festa gronda. Els ed ellas s'uneschan per l'occasiun tar in ensemble ch'ha num Uniun Musicala Engiadina
«Insembel a Biel»
Sut quest motto ha ina pitschna gruppa enturn Reto Lehner da Zernez decis, da sporscher da pudair ir tuttina.
Nus n'eran betg segirs, quanta glieud ch'ha interess da sa participar. Cun uschè bleras persunas n'avevan pero betg fatg quint.
Gia in pér emnas suenter avair fatg public la spierta, sajan 75 musicantas e musicants s'annunziads per il project. Ils iniziants avevan en sasez be fatg quint cun 35 fin 40 persunas. Perquai han els lura decis, da serrar l’annunzia.
Lavur d’organisaziun sto gia uss cumenzar
Sa preparar sto la gruppa gia uss. Igl è da reservar hotels, d'organisar il viadi ma era tscherner tocs da musica ch'èn adattads a la gruppa – tut lavurs che ston vegnir fatgas ordavant. Reto Lehner ha però experientschas cun tals projects. El è gia stà da la partida da projects sumegliants a las duas ultimas festas federalas.
Nus vain in bun mix da glieud, tut da persunas fitg giuvnas fin pli veglias. Ma er il mix d’instruments è grondius per quest project.
Uschia saja l’organisaziun pli simpla, perquai che questas experientschas gidian a surmuntar grondas sfidas.
Naginas aspectativas grondas
Suenter trais fin quatter provas durant la primavaira sajan ins pront per il grond palc a Bienna.
Durant la preschentaziun a Bienna pigl jau si la bachetta e na sun betg gnervus. Per midar insatge èsi lura gia memia tard.
Reto Lehner na spetga betg da gudagnar insatge cun quest project. El speria pero, che tut ils musicants e las musicantas hajan plaschair da sunar ensemen, e possian giudair la festa federala da musica a Bienna.