Chalandamarz a Sent - «Chantar chanzuns tradiziunalas è era l'onn 2026 anc insatge bel»

Il chant da Chalandamarz

Era l'onn 2026 vala il chant da Chalandamarz a Sent sco insatge fitg impurtant. Or d'in repertori da var 16 chanzuns vegnan mintg'onn tschernidas diesch. Trais da questas chanzuns, numnadamain «Cur cha prümavaira», «Chalandamarz chaladavrigl» e «Sa val voul verer» èn mintg'onn part dal program. Tschellas set varieschan mintg'onn in pau.

Per ch'i tunia bain il prim da marz vegnan natiralmain era fatg provas da chant. Quellas vegnan fatgas durant il temp da scola, l'emprim en las singulas classa e vers la fin datti lura era provas cuminaivlas. Era la rolla d'intunar vegn surpigliada da las scolaras ed ils scolars. Il pli vegl e la pli veglia da la novavla classa dirigian il chant cuminaivel.

Impressiuns da l'emprim da marz a Sent

Tgi sa vestgescha co?

Durant il cortegi han ils uffants differentas rollas. Questas rollas vegnan repartidas tut tenor vegliadetgna. Ils uffants d'emprima classa èn nanins. Els vegnan accumpagnads da las mattas las pli veglias che portan in costum da lavur. Ils uffants da segunda fin otgavla classa portan la blusa blaua e la chapitscha cotschna. Ils mats ils pli vegls èn pasters. Els han da procurar per urden durant il cortegi.

Ils nanins: ina specialitad dal Chalandamarz a Sent

Il bal da Chalandamarz

Tar il Chalandamarz da Sent tutga era in bal. Davomezdi datti in bal per il uffants pli pitschens e la saira cuntinuescha lura il bal per ils gronds. Tar quest bal tutgan era intgins sauts sco «La lavina», «Il tschigrun» u era «La polonaise». Quests sauts vegnan exercitads e preschentads mintg'onn danovamain.

In sguard en l'archiv