Di da la musica svizra 2025 - VIVA la musica svizra – RTR celebrescha cun blera musica live

Impressiuns dal di da la musica svizra 2025

Mez settember è stà il di per celebrar la musica svizra. Sper 100% musica svizra durant l’entir di en il radio RTR munta quai era adina giasts live en il studio. Per quella chaschun èn sa preschentadas ina u l’autra vusch enconuschenta, dentant pudais qua era far scuvridas. Differents stils, geners e vuschs èn stads d'udir durant l'entir di.

Tut ils videos da musica

Plüss

Seraina Hanselmann aka. Plüss abitescha per il mument a Stugl en il Grischun ed è oriundamain da Filisur. La dunna da 25 onns ha dentant gia abità en l’Engalterra, Brasilia, Chile e Norvegia. Musica saja per ella ina part da ses mintgadi e sias chanzuns èn ruassaivlas, sinceras e plain sentiment. Cun set onns ha ella emprendì da sunar clavazin, pli tard anc ghitarra e cun 14 ha ella cumenzà cun la scolaziun da chant.

Plüss live en la Lounge RTR

Paula Mia

Da la lavur davos las culissas sin tribuna: Damai che la mamma da la chantautura organisescha dapi insaquants onns concerts en il «Cinema sil Plaz» a Glion ha ella passentà bler temp davos las culissas. Ha vis soundchecks e concerts, ha accumpagnà musicistas e musicists avant, durant e suenter lur preschentaziuns. Uschia ha ella sper la passiun per la musica era chattà l’interess vi da la lavur d’organisar concerts. La passiun ha manà ella il 2020 a la ZHdK (Scola auta turitgaisa dals arts) nua ch’ella ha studegià musica da jazz.

Paula Mia live en la Lounge RTR

Flavia Capello

L’ina u l’auter enconuscha ella forsa anc da l’emissiun Late Lounge Live nua ch’ella ha fatg part da la Late Lounge Band. Ella lavura sco scolasta da chant e Songwriting-Coach en il Blue Wonder a Cuira. Uschia ha ella era gia sustegnì musicistas grischunas sco per exempel ANIKK ubain Julie Fox. Sper quai scriva ella era texts per differentas artistas ed artists. Dapi curt ha ella era publitgà atgna musica. Sin sia emprima EP «Hot Blood» ch’è cumparida la stad 2025 sa chattan tschintg chanzuns englaisas.

Flavia Capello live en la Lounge RTR

Cinzia

Saja quai sin tribuna vi dal clavazin u cun chantar, durant in musical ubain en in hotel sco «Jukebox» umana – in vita senza musica na funcziuna betg per Cinzia Regensburger. Cun set onns ha ella retschet in clavazin e dapi lura fa ella musica. Dapi lura ha ella scrit, arranschà ed organisà trais musicals, ha fatg part d’in project cun il «Golden Gate Symphony Orchestra» a San Francisco ed il 2024 gudagnà ensemen cun sia band il Prix Walo pitschen. Ella publitgescha sia proxima EP ils 10 d'october cun in concert en il chastè da Tarasp.

Cinzia live en la Lounge RTR

Mario Pacchioli

Popstar, Musicstar, Chansonier, interpret da musical. Mario Pacchioli na ston ins atgnamain betg pli preschentar en Rumantschia. Tras l’emissiun da casting Musicstar è l’um da Rabius cun ina giada stà amez il business da musica ed enconuschent en l’entira Svizra. Suenter ha el dentant chattà la via dal pop al chanson franzos.

Cumenzà sco «Piccolo Mario» en la vegliadetgna da sis onns ensemen cun sia mamma ha la carriera manà da la musica populara, tar la musica classica, tar la gruppa Maconga (ch’è era stada enconuschenta en ed ordaifer la Svizra) e la musica da pop sco artist da solo tar l’emissiun Musicstar. In cuntract cun Universal e l’emprima single «Tier tei» che ha cuntanschì plaz 3 en la parada da hits Svizra.

Mario Pacchioli live en la Lounge RTR

Maria de Val

Dal Tirol dal Sid sin tribuna a Cuira – Maria Moling uss tranter auter solo da viadi sco Maria de Val è tranter auter era enconuschenta sco anteriura commembra da la gruppa ladina Ganes ubain era dal duo Me + Marie. Entschatta da l’onn ha ella publitgà la EP «Mëda Medusa». Sco Ladina en il Tirol dal Sid, sco Tirolaisa en l’Italia, sco Taliana en Germania e sco battarista en in mund musical dominà d’umens – Maria Moling ha savens gì in zic in’autra vista sin il mund enturn ella.

Maria de Val live en la Lounge RTR

Arkas

Musica en Mundart, dentant betg musica ruassaivla, nagin chantautur mabain musica che fa canera e conuscha be il gir d’avanzar. Quai è la musica che Arkas alias Raphael Leu preschenta dapi curt. Fin ussa ha el sunà tar differentas indie-bands svizras, tranter auter era per Happy For Real. Uss cumbinescha el sia passiun per il post-punk e rap. Cun «Mittagsschlof» ha el quest onn publitgà sia emprima single.

Arkas live en la Lounge RTR

La cumpart da la musica svizra

Schebain pop, rock, musica populara, jazz, opera, chant da chors ubain musica classica: Musica svizra da tuts geners vegn emessa sin ils emetturs da la SRG ed ha uschia ina gronda muntada. La cumpart da la musica svizra è tar tut ils emetturs gronda.

Tar RTR munta quai sur l’entir onn bun 50%. Cun il di da la musica svizra vulan ils emetturs porscher ina tribuna a la musica varianta, da tuttas linguas e da tut ils geners, per uschia anc ina giada far attent sin noss stgazi musical prezius.

Il di da la musica svizra tar la SRG

Quest di musical vegn celebrà en l’entir pajais. Uschia sa preschenta per exempel tar SRF la gruppa Hecht cun in live showcase.