Il musicist da 21 onns da Hemberg (SG) sa participescha cun la chanzun «Watergun» a l'ESC Contest. Tenor la communicaziun possedia «Watergun» tuttas ingredienzas necessarias per in grond pop-song: in tema relevant, ina melodia muentanta ed in text ch'intermediescha en ferms maletgs in sentiment da vita.
Cun questa chanzun vi jau commover. Nus, en spezial mia generaziun, essan confruntads ozendi cun crisas globalas e guerras. E nus stuain viver cun consequenzas da decisiuns che betg nus avain prendì. Quai è frustrant. Tuttina hai jau la speranza che midadas èn pussaivlas. Il song ves jau sco appel per pasch ed in avegnir plain speranza.
«Watergun» è vegnì scrit en il rom d'in champ per scriver chanzuns ch'è vegnì organisà da la SUISA (Societad svizra per ils dretgs dals auturs d'ovras musicalas) en collavuraziun cun Pele Loriano Productions. Cumponì la ballada da pop han Argyle Singh, Ashley Hicklin e Mikolaj Trybulec.
Occurrenza e termin d'emissiun
L'Eurovision Song Contest cuntanscha mintg'onn passa 160 milliuns aspectaturas ed aspectaturs sin l'entir mund e tutga tar las occurrenzas da televisiun las pli spectacularas. Quest onn sa participeschan artistas ed artists ord 37 pajais e nizzegian la chaschun per preschentar lur pajais e sasez durant quests dis.
Il 2023 ha lieu il 67avel «Eurovision Song Contest» a Liverpool. La Gronda Britannia remplazza l'Ucraina che ha gudagnà l'ESC 2022 cun il Kalush Orchestra che na po per motivs da segirtad dentant betg realisar la concurrenza.
L'emprim mezfinal (incl. la Svizra) è ils 9 da matg 2023 en la Liverpool Arena, il segund mezfinal è gievgia ils 11 da matg. Omadus mezfinals vegnan emess directamain sin SRF 2 ed il final ils 13 da matg 2023 vegn directamain sin SRF 1.
Co è il song vegnì tschernì?
Musicistas e musicists èn stads envidads d'inoltrar lur chanzuns per la participaziun svizra a l'Eurovision Song Contest (ESC) 2023 a Liverpool. Ina giuria internaziunala sco er in panel d'aspectaturs da 100 persunas ha giuditgà en pliras rundas las chanzuns. Quest panel duai simular uschè bain sco pussaivel ils resultats dal televoting dals bunamain 40 pajais che fan part a l'ESC. Sco tar il final dal ESC han ins quintà las vuschs per mintgamai 50%.
Il project «Eurovision Song Contest» 2023 realiseschan communablamain las quatter unitads d'interpresa SRF, RTS, RSI ed RTR.
