Veronica Fusaro da Thun va per la Svizra a l’Eurovision Song Contest. Per la musicista è la participaziun in’impurtanta renconuschientscha.
Dastgar represchentar la Svizra a l’ESC è per mai in grond regal da fidanza. Jau vi nizzegiar quella tribuna per preschentar mia musica sinceramain e senza mascra.
Cun grond plaschair guarda ella sin l'occurrenza a Vienna. L’ESC maina ensemen carstgauns, culturas e musica en ina moda unica. Esser part da quai e pudair preschentar sias chanzuns en in conturn internaziunal munti nunditg bler ad ella.
La chantautura da 28 onns Veronica Fusaro prenda part per la Svizra a la pli gronda concurrenza da musica dal mund. La 70avla ediziun da l’Eurovision Song Contest ha lieu quest onn a Vienna. La Svizra sa preschenta al segund mezfinal ils 14 da matg 2026.
Ina chanzun per tut las dunnas
Cun «Alice» porta Veronica Fusaro ina chanzun moderna sin il palc da l’ESC. Ina chanzun en il stil d’alternative-pop cun influenzas da rock che cumbinescha energia musicala cun in cuntegn cun ina clera perspectiva. La protagonista da la chanzun, Alice na viva betg en in pajais miraculus mabain en ina realitad en la quala surpassaments da cunfins persunals vegnan zuppentads sco gests d’affecziun. La chanzun tematisescha violenza en differentas furmas – betg be corporalmain mabain era psichic en furma d’abus da pussanza e controlla. La figura Alice stat qua substituind per dunnas che han fatg experientscha cun violenza – era en furmas na visiblas.
Musicalmain resplenda la chanzun era quella tensiun tematica. In ritmus che fa endament in valzer da 6/8 creescha l’entschatta in sentiment da levezza avant ch’in marcant rock-riff intensivescha l’atmosfera. La chanzun è naschida en collavuraziun cun la producenta Charlie McClean che ha tranter auter gia lavurà cun Diana Ross ubain Icona Pop e che ha gia retschet divers premis da musica.
Dal «Best Talent» sin la tribuna internaziunala
Veronica Fusaro è in’artista che sa preschenta sin tribunas internaziunals e sias prestaziuns live fan gronda impressiun. Gia l'onn 2016 è ella vegnida selecziunada sco SRF 3 «Best Talent». Dapi lura ha ella sunà varga 500 concert en Svizra sco era en l’exteriur – tranter quai era concerts a festivals cun renum sco per exempel il Glastonbury Festival en l’Engalterra, il Montreux Jazz Festival ubain il Gurtenfestival. Ultra da quai è ella stada la pregruppa per concerts da Mark Knopfler e Nîmes e l'onn 2023 ha ella terminà cun ina Headline-Show en il Kaufleuten a Turitg.
Sviluppar l’atgna musica
En il center da sia lavur actuala è l’album «Looking for Connection» ch’è cumparì ils 24 d’october 2025. En quel raquinta la chantautura da la vita durant la postmoderna e dal basegn creschent da autenticitad. Cun ses texts e sias melodias emprova ella da crear in spazi musical en il qual ins senta colliaziuns realas. Gia ses album da debut «All the Colors of the Sky» (2023) ha cuntanschì il 5avel plaz en la parada da hits svizra ed ha retschet resuns positivs da las medias e fans. Enconuschenta per sia ferma preschientscha sin tribuna che colliescha vulnerabladad e segirezza da sasez, commova Veronica Fusaro ses public cun ses text e sia vusch unica.
Co funcziuna la selecziun?
Musicistas e musicists han pudì inoltrar lur chanzuns per la participaziun da la Svizra per l’Eurovision Song Contest 2026. En tut èn 493 chanzuns vegnidas inoltradas. Ina giuria internaziunala dal public e dal fatg ha lura fatg ina selecziun sur pliras fasas. Sco tar il final da l’ESC han las vuschs quintà per mintgamai 50 pertschient.
Ed uss?
Fredrik “Benke” Rydman è responsabel per la realisaziun artistica da la preschentaziun da Veronica Fusaro a l’ESC. Il directur artistic cun renum vala sco in dals chaus creativs cun il pli grond success en l’istorgia da l’Eurovision Song Contest. Tranter auter ha el gudagnà la concurrenza cun Måns Zelmerlöw per la Svezia l'onn 2015 e cun Nemo per la Svizra l'onn 2024. Cun il candidat finlandais Käärijä è el daventà segund l'onn 2023. Per Veronica Fusaro sviluppescha Rydman in’inscenaziun che duai metter il stil, la preschientscha emoziunala sco era la profunditad narrativa da la chantautura en il center.
Cura?
La 70avla ediziun da l’Eurovision Song Contest ha lieu a Vienna. Ils mezfinals vegnan ad avair lieu ils 12 ed ils 14 da matg 2026 (emess sin SRF 2) ed il final ils 16 da matg live da la halla da citad da Vienna (emess sin SRF 1). Quest onn vegnan artistas ed artists da 35 pajais a sa participar. Cun var 170 milliuns aspectaturas ed aspectaturs sin l’entir mund tutga l’ESC tar ils pli gronds eveniments da televisiun sin l’entir mund.
Live al Gurtenfestival 2023
Il project Eurovision Song Contest realiseschan SRF, RTS, RSI ed RTR communablamain.