Festival Scuol Classics - «O Fortuna» cun amaturs e profis

Quest project inscenescha ina da las pli impressiunantas ovras da chor dal 20avel tschientaner. Tar quest project sa tracti d'ina collavuraziun che duai far punts, d'ina vart tranter amaturas e profis, dentant era punts geograficas. L'orchester per quest project che vegn realisà a Scuol deriva numnadamain da San Francisco.

Il chor sa cumpona da chantaduras e chantadurs da l'Engiadina sco era da persunas dals Stadis Unids. Il manader musical da quest project è il Grischun Urs Leonhardt Steiner che viva dapi onns a San Francisco.

Il chor da project

In chor d'amaturas ed amaturs, ch'è stà fin la fin da matg sut la direcziun da Martin Zimmermann, vegn a star sin il palc ensemen cun il Golden Gate Symphony Orchestra and Chorus da San Francisco sut la direcziun musicala dad Urs Leonhard Steiner.

L'intent principal da quest project è da pussibilitar a tut quellas e quels ch'han plaschair da far musica a moda cuminaivla d'esser part d'ina tala ovra.

Sper la capodovra dad Orff vegnan ils concerts tranter auter era a preschentar ina schelta da chanzuns popularas rumantschas che vegnan era accumpagnadas da l'orchester.

L'ovra da Carl Orff

La Carmina Burana da Carl Orff tutga tar las ovras da chor las pli enconuschentas insumma. Enconuschenta surtut causa il preludi pussant «O Fortuna» che dechanta il destin.

L'ovra dal 20avel tschientaner metta en musica texts medievals davart l'amur, la primavaira, il giudiment e la passageritad. Pervi da las midadas tranter chors vigurus e muments solistics porscha l'ovra fitg bleras fassettas che procuran per gronda variaziun musicala.

Podcast Artg musical

L'Artg musical collia la diversitad musicala cun la profunditad schurnalistica. En mintga emissiun discutescha la redactura/ il redactur da RTR ensemen cun ils giasts davart musica da chors, brass, classica e temas actuals or da la scena da musica.

Ulteriurs audios e podcasts