Già dapi il 1980 datti il festival da folk da la EBU (European Brodcasting Union). L’eveniment da giubileum, il 40avel, è vegnì organisà en Germania en il rom dal festival da Rudolstadt/Thüringen dals 4 als 7 da fanadur. Per represchentar la Svizra è vegnida envidada la «Husistein-Musik», ina chapella da vaglia dal chantun Lucerna. Ella ha sunà en l'iert dal chastè da Heideck ed ha pudì fascinar in grond public cun ses sauts che han lur ragischs en il 19avel tschentaner.
La «Husistein-Musik» exista dapi il 2015, ella è vegnida furmada da Evi Güdel-Tanner che suna fagot, cun Andri Mischol e Rita Rohrer, (violina) – Armin Müller, (clarinetta), e Lukas Erni, (cornet). Lur emprim project è stà in cun musica dal 19avel tschentaner, tocs populars da la regiun da Willisau. Sco blers auters eran quels svanids en tschalers ed archivs – fin ch’els èn vegnids rescuverts da Adrian Steger, in descendent dal musicant Anton Husistein, il fundatur da la furmaziun originala dal 19 avel tschentaner.
Ils tocs èn vegnids arranschads danovamain, e las vuschs che mancavan èn vegnidas agiuntadas. Il resultat: il disc «Pächtönelis Erbe» cun 20 sauts. «Pächtöneli» era il surnum da Anton Husistein. El era chalger, sunava la violina e la trumbetta e sia furmaziun era ina da las impurtantas da quels onns.
Rudolstadt Festival 2019
Quest festival che preschenta musica populara, folk e musica tradiziunala è il pli grond da la Germania cun var 100'000 aspectaturas ed aspectaturs. Las ragischs tanschan enavos fin a l’onn 1955. Quella giada, en l’anteriura DDR, è stada l’emprima festa dal saut popular tudestg.
Program cun 300 concerts
Il program da Rudolstadt è stà grond e vast. Sin 30 palcs èn vegnids preschentads 300 concerts cun artistas ed artists da 40 pajais. Igl ha dà musica da tut ils geners e colurs en ina atmosfera simpatica ed agreabla, ed er ils aspects culinarics èn impurtants. En tut las vias e giassas da la citad veglia datti mangiativas e bavrondas en gronda variaziun.
40avel festival da folk da la EBU
L’inscunter cun tradiziun ha la finamira da preschentar musica tradiziunala, folk e folclora da tut l’Europa e mussa la gronda multifaradad e varietad. In’ulteriura finamira è da preservar tradiziuns, e da pussibiltar in barat cultural. Ils concerts vegnan registrads e mess a disposiziun als radios publics da tut l’Europa e cuntanschan cun quai in grond auditori.
Per sia ediziun da giubileum ha il festival da folk da la EBU dastgà esser giast a Rudolstadt, ed er l'onn proxim vegn quai ad esser il cas.
