Flurin Caviezel è naschì ils 8 da schaner 1956. Il musicist e cabarettist è creschì si a Ramosch, en Bregaglia ed a Cuira. Cumenzà a far musica aveva el ensemen cun ses frar Nott che sunava la clarinetta. Per avair anc in pau accumpagnament era cler che il giuven Flurin survegnia en maun in accordeon. Lur musica da lez temp: la musica populara.
In sguard en l'archiv
En ils onns 1970 durant ses temp a la scola chantunala a Cuira ha el lura gì la chaschun da vegnir en contact cun musica da jazz. Sco successur da Paulin Nuotclà è el daventà ghitarrist da la uschenumnada «Dog House Jazz Band» – ina band da gimnasiasts cun bunamain mo commembers rumantschs.
Per mai era in'onur da pudair esser part da la «Dog House Jazz Band» – cunzunt perquai che tschels da la gruppa eran tuts pli vegls che jau!
Suenter ses temp al gimnasi aveva Flurin Caviezel il desideri da bandunar per in temp il Grischun. Causa che ses frar viveva da lez temp a Fribourg ha er el decidì da partir per la Svizra francesa nua ch'el ha cumenzà a prender uras da gìa. Sin cussegl da sia magistra da violina ha el lura dentant midà sin la viola per avair dapli pussibiltats da pudair sunar en in orchester. Sco bratschist en il «Orchestre de la Ville et de l'Université de Fribourg» ha el lura pudì far emprimas experienzas en in orchester sinfonic d'amaturs. Era cun esser in toc davent dal Grischun ha el adina era tgirà vinavant las collavuraziuns musicalas cun glieud da sia patria. Uschia ha el durant ils onns 1980 tranter auter era fatg musica cun il chantautur engiadinais, Paulin Nuotclà.
La musica populara - sia lingua materna musicala
Gia il tat da Flurin Caviezel, che vegniva numnà barba Nott, fascheva musica populara. Uschia è questa passiun vegnida dada enavant era ad el e ses frar. Durant ils onns 1970 ed ils onns 1980 s'avevan els mess ensemen cun ils frars Janett. Cun questa furmaziun da bal han els sunà per varsaquantas occurrenzas.
Dal 1983 enfin l'onn 2000 è Flurin Caviezel stà part da la furmaziun «Ils Fränzlis da Tschlin». Sper sia rolla a la viola ha el adina puspè era scrit ed arranschà tocs per questa furmaziun. Per el saja fitg bel a pensar enavos a quest temp en il qual el haja pudì passentar ed emprender enorm bler.
Mintgatant devi concerts nua che tut funcziunava simplamain. Igl era sco d'esser en in auter mund.
Era sch'i haja dà temps nua che la musica populara na saja betg stada uschè preschenta en sia vita, saja quest stil da musica adina restà fitg datier ad el. Er oz anc haja el adina grond plaschair da far e tadlar musica populara.
