Vita e cretta: Tge è fortuna? - Flurin Caviezel: «La ventira vegn survalitada en nossa societad»
La finamira è dad esser satisfatg da quai ch’ins è e da quai ch’ins fa. Quai di il musicist e cabarettist Flurin Caviezel en Vita e cretta. Esser adina ventiraivel, quai fiss magari lungurus. Mintgatant dovri la sventira per sentir la ventira. Quella gida da definir la ventira.
Tge fa ventiraivel? Per Flurin Caviezel èsi persunas ed ina buna rait sociala. Ma er l'art, la musica e la litteratura fan ventiraivel el. La natira na gioghia betg uschè ina gronda rolla per sia ventira. El na saja per exempel betg uschè dependent da l’aura. In di da plievgia n'haja nagin’influenza sin sia ventira.
Legenda:
Flurin Caviezel n'ha nagina definiziun per ventira.
RTR
Applaus fa fitg ventiraivel. E suenter, en la gardaroba èsi in sentiment bunamain religius ch’jau sun enorm engraziaivel ch’jau poss far quai.
Flurin Caviezel sentia ventira en l’entir corp. Ma i saja pli simpel da dir, nua ch’ins senta la sventira, la tristezza. Lezza senta el cunzunt en il stumi.
I faschess bain dad esser pli conscient da la ventira, dad esser pli engraziaivel.
Ventira obligheschia da s’engaschar per quellas e quels che n’han betg tanta fortuna. Ventira definescha Flurin Caviezel pli gugent cun la sventira. El saja in uman fortunà. Ma tge valur che ventira haja en nossa vita, vesian ins pir cura ch’i na va betg bain.
Vita e cretta dumonda: Tge fa ventiraivel?
Avrir la boxSerrar la box
Giasts en la seria da stad cun las dumondas filosoficas:
«Per la fin da l'onn da scola: Tge fa ventiraivel, Chantal Marti-Müller?», 29-06-2025
«Tge fa ventiraivel il musicist e cabarettist Flurin Caviezel?», 06-07-2025
«Placi Degonda, fa gidar autras persunas ventiraivel?», 13-07-2025
