La vusch da mintga persuna è unica e singulara. Ins di magari che la vusch saja il spievel dal sa sentir e da l’olma. Quant ferm contribuescha la vusch tar la ventira en la vita da Flavia Walder? Cun ella ha RTR filosofà davart valurs e muntada da la vusch en connex cun la ventira.
Chant e givels sco impuls da la ventira
«Sche in uffant pitschen chanta durant far tramagls, lura è quai in mument da ventira, in mument magic che capita simplamain», di Flavia Walder. In uffant pitschen discuvra sia vusch gia baud cun givels, bragir e far lalas.
Cura ha Flavia Walder givlà da la ventira il davos temp? «Spontan, ma regord d'avair givlà tar in gol da la squadra naziunala svizra da las dunnas durant l'Euro».
Nagut è pli bel ch'exprimer ils sentiments cun la vusch.
In givel sco reflex da ventira fetschia bain al cor. Flavia n'haja naginas retegnientschas da s'exprimer cun la vusch ed ella haja era gugent cura autras persunas fetschian quai. Ma nua vesa Flavia Walder la differenza tranter la cuntentientscha e la ventira?
La cuntentientscha port jau cun mai mintgadi sche pussaivel. La ventira è ina chaussa dal mument.
Sco pedagoga da musica, dirigenta, chantadura e mamma, saja sia vusch indispensabla en il mintgadi. Manchia la vusch, haja ella in problem. La vusch possia magari patir fermamain causa in dafraid. «Il sforz da stuair taschair è in ferm sentiment», sincerescha Flavia Walder.
Eveniments da la vita, stress, tensiun u tristezza possian medemamain stenschentar la vusch. Chantar ed exprimer ils sentiments cun la vusch saja sco balsam per il cor. Flavia Walder vegn magari engaschada per chantar durant funcziuns da sepultura. «Savair che jau poss dar confiert cun mia vusch en muments da tristezza, quai fa bain al cor».
En paucs dis cumenza il nov onn da scola. Cun novas sfidas, novs projects da chant cun ils chors e novas sfidas tar l'instrucziun da musica e moviment. Cun tge tenuta va Flavia Walder vid il nov onn da scola?
«Quai è ina nova entschatta cun nov slantsch, ussa è tut organisà e planisà. Il nov onn po cumenzar cun buna vusch a la tschertga da la ventira».