Siglir tar il cuntegn
cuntegn

RTR Purple Nights Concert en la terma – ina sfida tecnica

Aua ed electricitad n'èn betg gronds amis. Quai è sper l'acustica e l'organisaziun en general ina da las pli grondas sfidas per ils responsabels da la tecnica tar il concert da Purple Nights en la terma da Val.

Per installar tut la tecnica: cameras, microfons, autpledaders, glisch sco era las tribunas per ils musicists saja l'emprim pass da laschar giu l'aua dal bogn, uschia Conrad Schlosser, il responsabel per la tecnica dal concert. Lura valia dad installar tut uschia che tut saja segir e suenter puspè laschar en l'aua.

Per che quai gartegia tut senza problems dovri però gia ordavant ils plans dal bogn, ed ina visita al lieu cun tut ils responsabels. Là vegnia en in tal cas sclerì, tge che saja insumma pussaivel e lura co realisar quai. In aspect che na fa betg pli simpel tut: L'hotel ed il bogn han avant e suenter las emprovas u lavurs da preparaziun adina puspè avert. Il bogn vegn serrà per ils giasts pir sonda a mezdi, uschia ch'i resta be in mez di per las preparativas finalas.

Ina da las pli grondas sfidas è, che nus avain fitg stretg cun il temp.
Autur: Conrad Schlosserresponsabel per la tecnica al concert en la terma da Val

La sfida umiditad

In auter fitg impurtant aspect ch'igl è da resguardar en la terma en cumparegliaziun cun auters lieus è la temperatura chauda e l'umiditad da passa 90%. Per evitar defects vi da las apparaturas vegnan quellas stgaudadas sin temperatura da manaschi en in local separà e pir lura endrizzadas en il bogn. Uschiglio pudessi tenor Conrad Schlosser dar aua condensada en l'intern e la tecnica disdiss entaifer curt temp.

La specialitad tecnica: la glisch violetta en l'aua

Per dar a la terma la tempra da «Purple Nights» – pia notgs violettas – è la glisch in element central ed uschia vegn er l'aua colurada. Ma betg cun laschar en chemia, mabain cun vacumar 15 fin 30 glischs violettas che vegnan lura sfundradas en il bogn. Uschia «nodan» ils musicists e la chantadura cun lur podests sin in lai violett.

RR actualitad 08:00