David Sontòn Caflisch sesa vid maisa. Dasper el ina gronda fanestra che mussa vers il verd. En sia chasa en vischinanza da Basilea èsi quiet, be tranteren vegn in dals dus giats sperasvi per ina charsinada.
Il musicist e cumponist è vi da far midaments vi da sia cumposiziun. Igl è in toc che dura in'ura ed ha premiera in occasiun da Purple Nights en la terma a Val.
Il toc è atgnamain in siemi en l'aua.
La terma haja in'acustica speziala, nua ch'i dat per part in eco da passa 15 secundas, di il cumponist. In fatg che sto vegnir resguardà cun cumponer il toc.
Il toc viva da l'improvisaziun. Sis chanzuns popularas rumantschas èn integradas. Notas na datti quasi naginas. I sa tracta plitost da descripziuns e skizzas che mussan fin a tge minuta che in'atmosfera dura e nua che la proxima cumenza.
Ils tschintg instruments classics vegnan accumpagnads da la chantadura Sara-Bigna Janett – e latiers vegnan tuns electronics cun in artist da musica electronica e ses computer. Da cumbinar quai saja schon in zic ina sfida.
Ina cumposiziun che viva dal mument
Duas emnas ha David Sontòn Caflisch gì per cumponer il toc. El ha fatg la scolaziun da musica classica cun la violina. Ma anc durant il studi haja el badà che la musica classica contemporana saja plitost ses stil, raquinta il cumponist.
El saja in perfecziunist – quai di el da sa sez, ma quai vesan ins er. Tar David Sontòn Caflisch ha tut ses lieu. E tuttina fa el musica, nua che tut capita simplamain. El scriva musica improvisada. Dus differents Davids che vegnan cumbinads tras la musica:
Ins pudess pensar che quai è paradox – perfecziun ed improvisaziun. Las indicaziuns dal toc èn dadas avant cleramain. Ins sto dentant esser perfetg per pudair stgaffir in'atmosfera cun improvisar sco musicist. Uschè van ils «dus Davids» bain ensemen.
Ed il toc tuna mintga giada ch'el vegn interpretà auter. Cun quai ch'i vegn improvisà viva la musica dal mument. Quai possian ins sa metter avant sco tar ina chasa: Las paraids èn dadas avant, però la chasa vegn adina puspè drizzada en da nov.
E sche Vus vulais savair co che la versiun finala tuna: Qua pudais Vus s'annunziar per Purple Nights da RTR, il 1. da december a Val.
RR actualitad 17:00
