Là nua che auters fan festa e sautan, lavura Marco Albertin. L’eventmanager oriund da Bever è dapi quatter onns responsabel per ils stans a la pli gronda festa svizra – la Street Parade a Turitg. Bunamain in milliun fans da tecno vegnan a ballar e guardar ils Lovemobiles.
Quai dat fom e fa said, cunzunt sch’i fa chaliras sco l’onn passà. Era per la Street Parade dals 8 d’avust 2026 dovri puspè ina massa stans. Marco Albertin ha cumenzà gia il favrer cun preparativas.
FMR: As legrais Vus sin la Street Parade?
Marco Albertin: Schon. Uss vai liber en paucs dis. Sperain ch’i fetschia bell’aura, lura dain nus vollgas.
Giais Vus era a far il raven?
Na, jau stun si la damaun da las 5.00 – e fin a las 14.00 hai jau da star londervi. Suenter vegni in pau pli quiet, ma sch’i dat in problem, hai jau da schliar quel.
Vus essas dapi quatter onns en il comité da la Street Parade e responsabel per «market- and food stalls». Tge è quai?
Quai èn ils stans cun mangiativas ubain ils stans che vendan chapels, egliers da sulegl, glitzer e glamour – vul dir food e nonfood. Ils stans cun da baiver, lezs organiseschan auters.
Quants stans èsi en tut?
Passa 120 stans en tut la citad ed enturn il lai. Sonda la damaun a las 6.00 vegni cumenzà, da las 12.00 sto tut esser pront, da las 14.00 cumenza il cortegi cun ils Lovemobiles. Tgi che ha in stan, fabritga si sez quel. Nus controllain ch’els sajan en il dretg lieu. Gia dus u trais dis avant vom jau tras la citad e marchesch giun plaun cun colur ils numers dals stans. Jau di adina, ch’jau fetschia sgrafits. Là cumenza per mai la Street Parade.
Tge problems poi dar il di da la Street Parade?
Magari vegn insatgi ch'avess ina plazza da trais meters cun in stan da quatter meters. U lura vegn in foodtruck che ha annunzià ina lunghezza da quatter meters, che ha però anc ina cabina da timun da dus meters. Ins sto lura l’ultim mument plazzar auter quel. Nus vulain ch’ils stans sajan propi in sper l’auter en fila per ch’ils aspectaturs e las aspectaturas na possian betg ir davos ils stans.
E tge faschais Vus, sch’insatgi dovra tuttenina dapli plaz?
Jau hai in team da diesch persunas che va la sonda avantmezdi a controllar. Els ston spustar in u l’auter stan per che tuts hajan plaz. Problems datti magari era sch’in foodtruck vuless avrir sia clappa, ed ins remartga ch’in bostg u ina laterna impedescha quai. Sin ils plans da la citad na vesan ins numnadamain betg ils bostgs.
Tge è in worst case?
L’onn passà avain nus gì intgins stans al Bürkliplatz ch'avevan il generatur ch’è crudà ora durant la festa. En tals cas na vegnin nus da far nagut pli. Ins na po betg ir tras la fulla cun mastergnants a remplazzar il generatur. Sch’ins è dad in maun dal lai, dovran ins duas uras per arrivar da l’auter maun.
Tge custa in stan?
Nus avain differentas zonas. En las meglras zonas custa in stan circa 3'000 francs cun electricitad e depot. Il depot vegn pajà enavos sch’il plaz resta suenter enavos en urden. Quels che vegnan, ston gia ordavant avair pajà tut. Trais quarts èn profi-martgadants, ma i dat era privats u uniuns che vendan.
Renda quai?
Gea, jau hai in in interprendider da catering che vegn mintg’onn cun otg stans. El è in profi e sa co far marschar per ch’i rendia. Singuls recloman mintgatant suenter la Street Parade: «O, a mai n’èsi betg ì bain.» I dependa da l’aura, co ch’in stan guarda ora ed adina era: Tge vul la glieud mangiar?
Cura cumenzais Vus ad organisar ils stans?
L’annunzia lasch jau ora il favrer. Intgins vulessan il pli gugent s’annunziar subit suenter la Street Parade per l’onn proxim. Cun bunamain in milliun aspectaturs ed aspectaturas è il potenzial qua per gudagnar bain e far raps, sch’ins lavura en urden.
È la Street Parade la pli gronda occurrenza che Vus gidais ad organisar?
Gea. Ma jau sun era da la partida al Silvesterzauber a Turitg. Là datti be tranter 100'000 e 200'000 visitaders e visitadras.
«Be»?
(sto rir) Sch’ins conguala cun la Street Parade èsi pauc. En pli dura il Silvesterzauber be paucas uras. La Street Parade dura dudesch uras. Il terz-grond event è il Greenfield ad Interlaken. A quest open air faschain nus – la Youngcom SA, nua ch’jau lavur – ina gronda tenda cun 15 bars. En sasez èsi ina bar surdimensiunada.
Vus lavurais pia per che auters possian far festa. È quai cool?
Sch’igl è bell’aura, èsi supercool. Las quatter giadas ch’jau sun stà da la partida a la Street Parade n’hai mai pluvì. La Street Parade è in exempel extraordinari. La damaun è la citad vida, lura cumenza la festa cun bunamain in milliun persunas ed entaifer 12 uras è tut puspè davent.
Tge è per Vus il meglier mument da la Street Parade?
A las 14.00, cura che tut ils stans èn pronts. Ed a mesanotg, sche jau n’hai clappà nagin telefon pervi dad incaps.
