La musica n'enconuscha nagins cunfins e collia persunas da tutta vegliadetgna. Quai sa mussa ina giada dapli en in lavuratori da flauta traversa che ha lieu sut la direcziun musicala da la versada scolasta da flauta traversa, Miriam Cipriani. Ella viva a Chiavenna ed instruescha dapi varsaquants onns a la Scola da musica da l'Engiadin'Ota. Sia finamira è d'unir giuven e vegl entras la passiun communabla per la flauta traversa.
Pertge in orchester da flauta traversa?
Il lavuratori sa drizza ad instrumentalists da tuttas vegliadetgnas e nivels. Mintgina e mintgin è envidà da sa participar a l'occurrenza. Miriam Cipriani, enconuschenta per sia metodica d'instrucziun engaschada ed inspiranta, creescha in'atmosfera nua che participantas e participants sa sentan bain e pon emprender in da l'auter.
L'idea davos il lavuratori che Miriam Cirpiani realisescha ensemen cun Flaviano Rossi e Giulio Bongiascia, è da promover il plaschair da far musica ensemen e da pussibilitar il barat tranter las generaziuns.
La musica è ina lingua universala che collia persunas. Igl è grondius da vesair co giuven e vegl s'entaupan e sa laschan inspirar dal far musica ensemen.
Durant il lavuratori na vegnan ils participants betg mo a meglierar lur abilitads tecnicas vi da la flauta traversa, mabain er ad avair la pussaivladad d'exercitar ensemen e d'elavurar in repertori. Quai na rinforza betg mo las abilitads musicalas, mabain era la convivenza sociala e la stima vicendaivla. Miriam Cipriani accentuescha l'impurtanza da talas qualitads.
In project sumegliant dovra natiralmain era glieud davos las culissas
In tal project na pretenda betg mo expertisas musicalas, mabain er in ferm engaschi en l'organisaziun. Schimun Caratsch è il president da l'uniun purtadra dal lavuratori.
Suenter las emprimas ediziuns han ils iniziants tuttenina fatg surasenn ch'in tal project drova in'organisaziun in pau pli professiunala.
El è il motor davos las culissas che rimna donaziuns e coordinescha las incumbensas organisatoricas per insumma pussibilitar quest lavuratori da flauta traversa.
