Il cudesch «fari farà farella» che cuntegna 33 chanzuns cun texts valladers duess porscher nov chant rumantsch per uffants. I vegn chantà dal «dromedar», dal «scarafag da furtüna», ubain era dal «bazegner» u la «nona» – tut tematicas adattadas al mund dals uffants.
Leta Mosca, anteriura magistra da Sent, è l’inizianta da l’entir project. Avant passa trais onns aveva ella survegni ina pitschna cumposiziun dal renumà musicist songagliais, Rudolf Lutz. Quel regal ha animà ella da realisar in cudesch che porscha novas chanzuns rumantschas ad uffants da scoletta e scola primara.
Sin basa da quell’idea ha il cumponist songagliais cumponì anc pliras chanzuns. La tscherna dals texts per las chanzuns è vegnida fatga da l’inizianta dal project e singuls texts ha Leta Mosca perfin scrit sezza. En la Quotidiana declera Rudolf Lutz ch’i n’era betg difficil da cumponer chanzuns rumantschas causa ch’el haja in bun sentiment per la melodia d’autras linguas.
Jau hai in fitg bun sentiment per autras linguas.
Per l’entira realisaziun dal cudesch è l’anteriura magistra primara vegnida sustegnida da la «Scoula da musica Engiadina Bassa/ValMüstair». Cun fundar ina gruppa da lavur han differentas persunas cun experientscha en il mund dal chant d’uffants pudì contribuir insatge al project. Per l’ina èn vegnidas fatgas ulteriuras cumposiziuns per cumplettar la paletta da chanzuns per il cudesch, per l’autra ha quella collavuraziun pussibilità d’empruvar ora sche las cumposiziuns èn propi era adattadas per uffants.
Cun differentas gruppas da scolaras e scolars da la «Scoula da musica Engiadina Bassa/Val Müstair» han las duas magistras Nina Mayer e Sidonia Caviezel emprais la gronda part da las chanzuns che il nov cudesch cuntegna. Uschè han pudì vegnir fatgas registraziuns che èn integradas en il carnet. Tar mintga chanzun chatt’ins in code da QR. Cun scannar quels codes cun in telefonin pon ins tadlar tut las chanzuns dal cudesch.
L’emprima ediziun dal «fari farà farella» na datti betg per cumprar. Cun contactar la «Scoula da musica Engiadina Bassa/Val Müstair» pon ins dentant retrair gratuitamain in exemplar.
