Mo in onn suenter sia EP da debut «Homeward Bound» publitgescha Julie Fox la proxima platta cun il titel «Each Heart Is A Garden». La musicista e chantautura grischuna e tessinaisa resta fidaivla a ses stil da folk.
Era tar quest disc focussescha Julie Fox sin chanzuns cun schlantsch e tuttina siemiusas, inspiradas da la natira ed ils culms grischuns sco era da la poesia englaisa.
Sin «Each Heart Is A Garden» pachetescha ella dentant en quella giada dapli instruments e differentas vuschs – che creeschan tarpuns variants per sias chanzuns. En tut èn quai tschintg chanzuns ed ina «uvertura».
Questas chanzuns èn naschidas avant bun in onn en il studio a chasa da Julie Fox. Las bleras parts ha ella registrà là, autras parts sin via ed ora en la natira. Quest onn ha ella lura finalisà ed elavurà las chanzuns cun il producent Joris Amann a Losanna.
In «i vegn schon bun» musical
Sco cuntrast tar l’album da Julie Fox è SÄM sa reducì per ses project da solo da la ska/punk band NoFuture be sin ina ghitarra e sia vusch. Il chantautur da Glion ha durant las ultimas emnas e mais publitgà single per single l’entir album «Witer im Takt».
En dialect grischun preschenta el otg chanzuns per la gronda part da pop. Las excepziuns èn las chanzuns «Paradies» - la collavuraziun cun Dario Hess e «S Beschte wos je hets gits» – là sentan ins puspè las ragischs dal rock da SÄM.
En general sa preschenta l’album cun chanzuns positivas, che duain tenor il musicist da la Surselva far curaschi dad ir l’atgna via ed esser conscient e cuntent cun quai ch’ins ha. Igl è pir ses segund album da solo suenter quel dal 2019. Ina part da las chanzuns ha SÄM scrit durant che las emprimas chanzuns èn gia stadas publitgadas.
Igl èn dus albums grischuns ch’emprovan sin duas differentas vias da purtar energias positivas ad audituras ed auditurs. In album metta sin musica cun pliras rasadas e fassettas, e l’auter reducescha la musica sin l’essenzial.
Dapli publicaziuns actualas da l’entir Grischun chattais en il release ticker:
