Siglir tar il cuntegn

Header

audio
Prevista 2024: In onn plain musica
Or da Actualitad dals 03.01.2024. Maletg: RTR
laschar ir. Durada: 4 minutas 11 Secundas.
cuntegn

Prevista Occurrenzas musicalas il 2024

RTR s’engascha fermamain per la scena da musica indigena e fa regularmain registraziuns cun chors, musicas e chapellas da musica populara ed era cun giuvens talents da musica da rock e pop. Quai faschain nus era l’onn 2024 nua che RTR po festivar 40 onns producziun da musica.

Cuira – Concurrenza da chors

Gia l'entschatta da l'onn datti in'occurrenza e concurrenza speziala per chors: La concurrenza svizra da chors. Chors or da l'entira Svizra vegnan a Cuira e sa preschentan dals 2 fin 4 da favrer davant las giurias en las baselgias Son Martin e Son Gliezi sco er en il Teater Cuira. Chors che vegnan valitads cun dapli che 23 puncts (il maximum è 25) dastgan sa preschentar al concert final.

En tut vegnan 67 chors a Cuira (radund 1'800 chantaduras e chantadurs) e tut ils chors sa preschentan er als «concerts d'inscunter» en l'auditorium GKB e la Postremise. Vitiers datti era concerts da gala, tranter auter in cun il Chor da giuvenils Grischun u ils Kings Singers. Natiralmain dat quai era bler material per nossas emissiuns «Artg musical» e «Noss chors».

Savognin – Registraziuns per nossas uniuns

Il 2023 ha RTR per l'emprima giada offrì als chors, a las musicas instrumentalas ed a las furmaziuns da musica populara la pussaivladad da far registraziuns da tun e maletg. A Flem (baselgia refurmada) ed a Zernez (halla da gimnastica) ha RTR endrizzà cameras, glisch e microfons per porscher a las uniuns participantas in eveniment singular. Quest onn repetin l'acziun e faschain la primavaira registraziuns a Savognin.

Il success da l'onn passà ha animà RTR dad era porscher registraziuns a musicistas e musicists e bands da rock, pop u hip-hop. La primavaira e l'atun èn reservads termins per far questas registraziuns dad audio e video en la Lounge.

Claustra – Festa chantunala da musica

Ils 8 e 9 da zercladur 2024 organisescha Claustra la 29avla festa chantunala. Passa 60 societads da musica, la gronda part dal Grischun, vegnan en il Partenz per sunar e far musica e laschar giuditgar lur prestaziun. Ina festa ch'era RTR accumpogna e fa registraziuns da tun e maletg. Questas registraziuns, sco era registraziuns da las ultimas festas da musica e chant ed era da concerts chattais sin rtr.ch/playfestas, ina preziusa trucca da stgazis musicals. Era sin PlayRTR audio e PlayRTR video ed era sin noss chanal da youtube chattais bleras registraziuns che RTR ha fatg ils ultims onns e decennis.

Trun – Festa districtuala da chant

In'emna suenter la Festa chantunala da musica, ils 15 da zercladur 2024, datti a Trun in'ulteriura festa da chant sursilvana. Igl è gia la 46avla ed annunziads èn radund 30 chors da divers geners. RTR registrescha las producziuns da tut ils chors cun tun e maletg. Pli tard vegn la festa lura era publitgada sco tuttas festas registradas sin noss portal da festas e concerts: rtr.ch/playfestas.

Playfestas

Avrir la box Serrar la box
violetter Hintergrund, Inschrift "Playfestas"
Legenda: logo Playfestas logo playfestas RTR

Vus chattais qua differentas registraziuns che 

 ha fatg en il decurs dals ultims onns per Vus. Quai èn registraziuns da discs cumpacts, concerts ubain era festas da chant e musica. Nus giavischain bun divertiment da tadlar ils tuns e suns.

RTR Radiotelevisiun Svizra Rumantscha

Degen – Open Air Lumnezia

La stad 2024, dals 25 fin ils 27 da fanadur, rapporta RTR per in'ulteriura giada dal pli grond eveniment musical en il Grischun: l'Open Air Lumnezia. Usitadamain datti ina vasta producziun d'audio e video direct da la tribuna a Degen. E tut quai è lura era da chattar sin ils differents chanals (PlayRTR, Youtube, MX3, Playfestas). Il pli simpel da chattar la purschida è dad cliccar sin rtr.ch/musica.

RTR actualitad 11:00

Artitgels legids il pli savens