Flurin Camathias è naschì ils 6 da mars 1871 a Laax sco figl da Gion Rest Camathias e Maria Onna (nata Arpagaus). El è battegià sin il num Joannes Florinus (Gion Flurin) ed ha visità la scola populara a Laax, il gimnasi a Mustér ed ha fatg l'universitad a Fribourg. El è stà da pitschna statura, tenor ses cudesch da servetsch be 161 cm. Dal 1892 – 1895 ha el studegià teologia en il seminari da predicants Son Gliezi a Cuira ed ha festivà sia ordinaziun ils 11 d'avust 1895 a Laax.
Spiritual
Dal 1896 fin il 1917 è el spiritual a Breil. Suenter surpiglia el fin l'onn 1934 la plaiv d'Andiat e dal 1934 fin il 1945 è el spiritual a Siat. Il 1930 vegn el nominà sco canoni ed il medem onn ils 4 d'october mora sia mamma. Set onns pli tard perda el er ses bab che mora suenter in accident.
Autur
Quasi durant si'entira vita ha Flurin Camathias scrit poesias e texts. Il 1900 cumpara ses epos istoric «Ils Retoromans». Pli tard «La flur de Ramuosch» (1909) e cun «Historias dil Munt Sogn Gieri» (1916) ina collecziun da ditgas e praulas enturn l'anteriur chastè a Vuorz. Per quell'ovra vegn el onurà il 1917 cun il premi Schiller. La Romania (oz Surselva Romontscha) deditgescha il 1921 ses emprim cudesch da la retscha «Nies Tschespet» medemamain a quell'ovra.
L'onn 1924 ha el scrit il gieu festiv «La Ligia Grischa» (anniversari da 500 onns Ligia Grischa). Vitiers ha el er translatà lirica da poets catalans u provenzals. El vala sco in dals impurtants poets e scrivents rumantschs. Numerusas (varga 100) da sias poesias èn vegnidas messas en musica tranter auter da Hans Erni u da Duri Sialm, singulas era da Gion Giusep Derungs. Ils 3 da favrer 1946 mora Flurin Camathias en l'ospital a Glion suenter ina curta malsogna. L'autu è sepulì a Laax.
Flurin Camathias en emissiuns da RTR
Qua chattais ina survista da differentas persunalitads ord la scena da cultura rumantscha.