Il chantautur da Gossau en il chantun Son Gagl para d’avair in dun per concurrenzas musicalas. Sper The Voice of Switzerland e sia participaziun a l’ESC 2023 a Liverpool è el era stà en televisiun en Germania. Suenter ch'el ha gudagnà il 2022 sia emissiun «Zeig uns deine Stimme» ha el decis da be pli far musica. Il medem onn sco l’ESC ha Remo Forrer era fatg part da «Masked Singer Switzerland» e medemamain fatg l’emprim plaz.
Suenter èsi dentant vegnì in zic pli ruassaivel. Il 2024 e 2025 hai dà turneas en clubs svizzers, duas EPs e pliras singles. Sia single actuala «Falling» ha gì success en ils radios svizzers ed è l’emprima chanzun da sia proxima EP.
ESC sco gronda schanza
Per il giuven musicist saja quai stada in’experientscha singulara. Avant, durant ed era anc in temp suenter l’Eurovision Song Contest è el stà fitg tschertgà, ils concerts èn pli u main adina stads vendids ora e l’interess vi da sia musica è en general stà fitg grond. Ton pli haja quai fatg mal cura che quai n’è betg pli stà il cas. Uschia hai duvrà in temp per Remo Forrer da s’endisar vid questa nova situaziun ed emprender danovamain da sa legrar era da pitschnas chaussas en sia carriera. Tuttina sa participass el puspè a l’ESC, malgrà che l’entira situaziun da la concurrenza saja tenor el ozendi pli cumplitgada.
Per il mument è el vid registrar e producir sia proxima EP e sa legra sin divers concerts en l’entira Svizra durant la stad. Malgrà il start rasant en sia carriera musicala haja el anc adina gronds siemis e plans: ina turnea en l’exteriur en Germania e l’Engalterra, ma era da na betg perder il plaschair da quai ch’el fa.
Hit per rumantsch
Dapi insaquants onns interpreteschan divers acts svizzers lur hits per rumantsch. Da Stress fin Pegasus, Adrian Stern e la Stubete Gäng han gia differents acceptà nossa sfida. Uss era Remo Forrer cun sia single actuala «Falling».
