Cun bleras chanzuns en il chau è Astrid Alexandre ida a Berlin tar Guy Sternberg, il producent cun il qual ella aveva gia lavurà vi da UMBRIVAS (2018). Pass per pass èsi vegnì cler tge chanzuns che restan e co ch'ellas duain tunar.
Enavos en Svizra ha ella sviluppà vinavant ils tocs avant ch'ella è danovamain turnada ensemen cun il cuntrabassist, Rees Coray, a Berlin a registrar.
In process en dialog
Cun il patratg d'entrar en resonanza cun autras ed auters ha la musicista decidì da realisar in entir disc cun ir a la tschertga d'istorgias e texts d'autras persunas. Tadlar vicendaivlamain n'è betg mo simplamain deponer opiniuns senza mussar empatia. Quai saja tenor la musicista grischuna insatge che la societad na possia betg propi far pli.
Mintgin ha sia opiniun e proclamescha forsa quella cun scriver insatge en l'internet – propi a barats e discussiuns che animeschan da reflectar ils agens patratgs vegni dentant pauc.
La musicista ha mess en sias differentas istorgias, texts ubain tocs da teater ch'han muventà insatge en ella u sco ella di «resunà cun mai». Plinavant ha Astrid Alexandre tramess ses tuns ad autras artistas ed auters artists da differentas spartas cun la dumonda d'entrar en resonanza cun ina u l'autra chanzun.
Per exempel è vegnida scritta ina poesia sin basa d'ina curta passascha instrumentala – quai mo ina da las numerusas resonanzas ch'i ha dà grazia a quest project.
Quai betg per midar u transfurmar las chanzuns existentas, mabain per intimar a las persunas da forsa laschar nascher insatge nov cun l'impuls d'ina u l'autra chanzun.
Co tuna l'album?
D'ina vart sa tractia dal pli quiet disc che la chantautura haja publitgà enfin ussa, ma al medem mument na saja ella anc mai s'exprimida uschè dad aut sco sin ses album actual.
Jau n'hai mai ditg chaussas uschè dad aut sco sin quest album.
Il motto saja stà d'avair il curaschi da far dumondas ed il medem mument da laschar bler spazi tranter las lingias – apunta per agens patratgs u resonanzas. En quest connex haja ella decidì da producir ses disc a moda fitg filigrana senza ina gronda band. Sper in u l'auter giast ch'haja procurà per intgins tuns instrumentals, stettian en emprima lingia sia vusch ed il gìun en il center.
En in mund da musica che prescriva fitg ferm co ch'ina chanzun haja d'esser per ch'ella correspundia a la norma ed haja «success economic», na saja betg adina simpel da ristgar da far pli pauc. Ella haja decidì da reducir, era cun esser conscienta da consequenza pussaivlas per ella sco artista.
L'avischinaziun reducida persequitescha la chantautura dal reminent era tar ils concerts per la nova ovra. Quels suna ella en il duo, per part era «unplugged» cun Rees Coray.