Nicola Gaudenz da Müstair - La professiun dal survegliader da pestga è unica

Nicola Gaudenz da Müstair deriva dad ina famiglia da reverendas da Scuol. Ses bab Duri Gaudenz era reverenda, ses tat Jachen Ulrich Gaudenz era reverenda ed era ses basat aveva questa professiun. Malgrà che Nicola Gaudenz deriva d'ina famiglia da reverendas è el ì in’autra via. Suenter la matura ha el fatg il seminari da magisters ed ha dà durant 15 onns scola.

Da pitschen davent aveva el plaschair vi da la natira e vi da la pestga. Nicola Gaudenz era in pestgader passiunà. Cura ch'el ha survegnì la schanza da midar da la stanza da scola en la piscicultura da Müstair e da surprender il post dal survegliader da pestga per l’Engiadina Bassa e la Val Müstair ha el fatg quel. El ha pudì far or da sia gronda passiun la professiun.  

Fatg il pass da la stanza da scola en la piscicultura 

Suenter 15 onns instrucziun ha Nicola Gaudenz survegnì la schanza da midar en la piscicultura a Müstair sco survegliader da pestga. E là è el responsabel per l'allevament da peschs, el s’occupa dals flums e da las auas en la regiun, e scolescha giuvnas pestgadras e pestgaders per che quels possian far lur hobi tenor las pli novas enconuschientschas en connex cun la pestga e la tgira dals peschs.

Il desideri dad ir uss, ch'el è il survegliader da pestga, anc sez a pestgar n'è betg pli uschè grond. Oz va Nicola Gaudenz mo pli tranteren cun collegas a pestgar.  

Il stadi dals flums en la regiun è bun

En general po Nicola Gaudenz dir ch’il stadi dals flums en la regiun è bun. Magari empleneschan bovas ils fops e las lomas per exempel en l’En. Il pli grond flum dal district tschintg da pestga. Suenter ina bova mida uschia la structura da l’En ed ils peschs han pli paucas plazzas da repos ni per magliar. Ils peschs han alura da sviar en in auter lieu. Per il solit as refan ils flums d'in tal eveniment e porschan als peschs lura puspè in conturn natiral.

Or da l'archiv: