Passa 30'000 ovras cumpiglia la collecziun da la fundaziun Capauliana. L’accent principal da la collecziun è l’art grischun. Perquai ch’i dat entaifer quellas er intginas ovras rumantschas, ha la fundaziun decidì da deditgar in’atgna exposiziun a l’art rumantsch. Sut il num «Rumantsch!» ha la curatura e manadra da fatschenta da la fundaziun Capauliana rimnà differentas ovras. A la vernissascha venderdi passà en la veglia praschun dal Sennhof è vegnida averta l’exposiziun.
En l’exposiziun actuala èn exponidas ovras da differents artists ed artistas influenzà dal rumantsch. Ovras da Johann Feuerstein, Ester Vonplon, Not Vital, sco er Mirko Baselgia u Ladina Gaudenz pon ins contemplar actualmain en la Sala Capauliana.
La lingua da maletgs discurra qua. I na sa tracta betg da la lingua sasezza, i sa tracta dal sentiment e da la valur da reconuschientscha da l’art rumantsch.
L’exposiziun cumbinescha ovras istoricas or da la collecziun da la fundaziun cun ovras actualas. Questa confruntaziun mussa co che l’art è sa midà fin ussa e co ch’el sa sviluppa vinavant.
Tut las ovras chattan accoglientscha tar las visitadras ed ils visitaders. Duas dattan dentant en egl spezialmain tar ils blers. Ina mussa puschas ch'èn vegnidas magliuccadas da stgilat, culads en bronz – in'ovra da Mirko Baselgia.
-
Bild 1 von 2. Mirko Baselgia, Las flours digl gôt – Sciurus . Bildquelle: RTR.
-
Bild 2 von 2. Not Vital, 3 Pizs. Bildquelle: RTR.