L'artista Susan Hefuna è naschida l'onn 1962. Ella è creschida si en l'Egipta, en Germania ed en l'Austria. Oz viva ella a Düsseldorf ed a Cuira. Ses art cumpiglia dissegns, videos, fotografias, installaziuns e performanzas.
En sia exposiziun maina ella las visitadras ed ils visitaders tras otg differentas stanzas. Mintga stanza ha in'atgna atmosfera. Là pon ins vesair bleras differentas ovras.
Impressiuns da l'exposiziun da Susan Hefuna
-
Bild 1 von 4. Patience is beautiful, 2010. Bildquelle: RTR.
-
Bild 2 von 4. Grid Drawing, 2025. Bildquelle: RTR.
-
Bild 3 von 4. Red Zone, 2023/2024. Bildquelle: RZR.
-
Bild 4 von 4. Questas lavurs èn fatgas or da mangola egipziana. Bildquelle: RTR.
Ins vesa per exempel films che mussan tge che capita tar differentas cruschadas en divers lieus sin tut il mund. L'artista observa co ch'ils umans sa movan là e co ch'els van enturn in cun l'auter. Mintga cruschada è differenta – tut tenor pajais e lieu. Quels films numna ella «Crossroads».
In crossroad dal Times Square a New York è natiralmain tut auter, cun tut autras persunas e structuras ch'in crossroad en il Nildelta, en l'Egipta.
Dasper quels videos ves'ins era fotografias, dissegns, lavurs cun stoffa e cun laina. Susan Hefuna perscrutescha cun sia art l'interacziun dal lieu, dal temp e da la percepziun. Ella mussa quant ferm che noss ambient influenzescha la maniera co che nus vivain.
Daniela Keiser: «Oregano»
Il titel «Oregano» regorda l'emprim ad ina spezaria ch'ins enconuscha da la pizza. Ma tar l'exposiziun na vai betg per il mangiar, mabain per la lingua – tranter auter era la lingua dals segns sco tschintgavla lingua naziunala.
En ina stanza dal Museum d'art dal Grischun sa chattan divers pleds. Quels derivian oriundamain d'in newsletter da la lingua svizra da segns, declera l'artista Daniela Keiser. In da quels pleds è apunto «Oregano».
Quest pled è daventà adina pli impurtant, cunquai ch'i sa tracta da la dumonda: co pon ins translatar la savur da la spezaria en in'autra lingua?
Il fund da la stanza è picturà cun colur grischa ed alva. Visitadras e visitaders pon sa mover libramain, pon star en pe, pon pensar e discurrer in cun l'auter. Uschia nascha ina stanza sociala cun differentas furmas da communicaziun. L'installaziun è transibla ed ins sa chatta amez l'ovra «Oregano».
Cun «Oregano» mussa Daniela Keiser che la lingua è dapli che mo pleds discurrids. Communicaziun vegn era creada cun moviments, segns e cultura.