Oravant tut il Museum d'art dal Grischun guarda danovamain enavos sin in onn da record il 2025, l'emprima giada cun dapli che 50'000 visitadras e visitaders.
In onn spezial per il directur artistic, Stephan Kunz: «D'ina vart avain nus festegià giubileum, avant 125 onns è vegnida creada la basa per il Museum d'art dal Grischun. Nus avain dentant era gì in onn d'exposiziun spezial cun ina gronda exposiziun da giubileum a l'entschatta da l'onn. E lura en la segunda mesadad da l'onn ina gronda exposiziun cun Diego Giacometti ed ina cun Leiko Ikemura, che han manà bleras visitadras e blers visitaders en il Museum d'art dal Grischun.»
Quai che dat en egl en spezial saja la quota auta da giasts internaziunals. Surtut ils mais da stad haja il Museum d'art dal Grischun pudì dumbrar passa 50% visitadras e visitaders da l'exteriur. Ins haja s'elavurà ina buna reputaziun sur ils ultims onns. Ed i dettia adina puspè glieud che vegn qua e che sappia ch'i dettia exposiziuns interessantas. Quai gidia per attrair in public pli grond, era da pli lunsch davent, manegia Stephan Kunz.
Interess nuninterrut per la natira
In pau pli paucas visitadras e visitaders che tar il Museum d'art, ma tuttina dapli che 39'000 persunas, èn idas l'onn passà sur la sava dal Museum da natira dal Grischun a Cuira. Probabel la segunda auta cifra da l'istorgia dal museum, di il directur Ueli Rehsteiner: «Quai è ina cifra fitg auta per nus, ina bella cifra natiralmain e mussa simplamain l'interess nuninterrut per la natira en general, ma er en quest senn per il Museum da natira dal Grischun.»
Il public saja dentant in pau in auter che tar l'art. Giasts internaziunals gioghian qua ina rolla pli pitschna. Ins possia be fitg limitadamain cumparegliar museums in cun l'auter. Il Museum da la natira haja per exempel gì l'onn passà ina exposiziun speziala davart la vulp e lura ina davart il clima.
Ma quai saja in tut auter sistem ch'en l'art. Ed il Museum da la natira saja per propi adina stà bler main orientà sin giasts internaziunals, di Ueli Rehsteiner vinavant. «Noss public sa cumpona per propi or dal chantun, or dal conturn.»
Uschè bleras visitadras e visitaders sco anc mai
Ed er il terz museum chantunal, il Museum retic, ha registrà l'onn passà in record, cun dapli che 20'000 visitadras e visitaders. In success che haja tenor el plirs motivs, di il directur dal museum, Guadench Dazzi: «In ha segir da far cun l'offerta. I dat exposiziuns che tiran forsa in public pli vast, in public pli grond, che currespunda al gust da pliras persunas, ma igl è mintgatant er impurtant ch'ins fa forsa rauba pli specifica, pli speziala che po forsa be interessar ina tscherta gruppa.»
Guadench Dazzi agiunta ch'era l'aura haja ina influenza. Sch'i na saja betg uschè bell'aura giaja ins plitost en il museum. Ed er il turissem gioga ina rolla. Sch'i dettia blers giasts a Cuira ed en ils hotels da Cuira profiteschian er ils museums da quai.
Onn da fitg grond success
Ed era museums privats guardan enavos cuntents sin l'onn passà. Per exempel Würth, ch'expona art sin l'entir mund. Er a Cuira en il Forum Würth.
Catia Tschuor che lavura tar la communicaziun da Würth International di: «Nus avain gì in onn da fitg grond success. Nus avain gì 18'000 visitadras e visitaders l'onn 2025 ed il mars avain nus pudì beneventar la 400'000avla visitadra insumma dapi l'avertura l'onn 2002.» Spezialmain bain frequentadas sajan mintgamai las exposiziuns da Nadal e talas d'artistas ed artists regiunals.
Il sguard sin il 2025 dat l'impressiun che museums en il Grischun sajan dumandads. Tant tar indigens ed indigenas sco era tar giasts da l'entir mund.