Il program d'exposiziuns 2026 dal Museum d'art dal Grischun mussa quant multifara ed internaziunala che la scena d'art dal Grischun è. E tuttina han tut las lavurs dals artists e da las artistas ina relaziun cun il Grischun.
Quai ch'è impurtant per nus – e quai fa era ora il profil da nossa chasa – è ch'ins lavura cun questa relaziun dal Grischun e che nus chattain adina puspè fassettas che fan surstar il public.
Trais exempels da tut las exposiziuns ch'i dat da vesair en il Museum d'art dal Grischun en il decurs dal 2026 èn las suandantas.
En l'atelier: spazi, lavur, mitus
Ina da las exposiziuns mussa quant different che ateliers pon esser – dal spazi da Giacometti fin a lieus da lavur mobils e digitals actuals. Da vesair èn ovras da Mirko Baselgia, Flurin Bisig, Stefan Gritsch, Maude Léonard-Contant, Catrin Lüthi sco er videos d'artists internaziunals sco Matthew Barney u Paul McCarthy. Il maletg fa visibel co che artistas ed artists pensan e lavuran ozendi.
Colliaziuns ordaifer ils cunfins da Susan Hefuna
In'exposiziun preschenta l'artista Susan Hefuna. La dunna da 63 onns è creschida si en l'Egipta, en la Germania ed en l'Austria. Oz viva ella en la Germania ed en la Svizra. Sia pratica artistica cumpiglia dissegn, fotografia, installaziun, video e performance. Las lavurs da Hefuna raquintan istorgias poeticas da citads, da cuntradas e da dialogs culturals. Ed ellas envidan las visitadras ed ils visitaders da s'approfundar en ses mund artistic e da percepir colliaziuns ordaifer ils cunfins.
«My Atlas» da Thomas Hirschhorn
L'artist Thomas Hirschhorn è creschi sì a Tavau e viva oz a Paris. Sia ovra «my Atlas» è ina retrospectiva da sia lavur e da sia vita.
Tomas Hirschhorn è enconuschent per sias installaziuns grondas. Ed el ha creà grondas tavlas d'atlas, davart tscherts temas e sias lavurs. Uschia po il public emprender d'enconuscher quellas ovras.
Sco mintg'onn datti er quest onn puspè ina exposiziun annuala. Là han talents giuvens dal Grischun la pussibilitad da mussar lur ovras en las stanzas dal museum, e da discurrer cun artistas ed artists da renum.