Siglir tar il cuntegn

Tranter mobiglias e sculpturas Museum d'art a Cuira metta Diego Giacometti en il center

Il Museum d'art dal Grischun a Cuira preschenta per l'emprima giada ina retrospectiva cumplessiva dal sculptur svizzer Diego Giacometti. L'exposiziun mussa la varietad e l'ovra independenta da l'artist, che stat savens en la sumbriva da ses frar renumà Alberto.

Fin uss è el per ordinari vegnì numnà ensemen cun ses frar Alberto sch'i gieva per l'art. L'exposiziun en il Museum d'art vul midar quai ed undrar la lavur da Diego Giacometti sco ovra independenta. Ditg è vegnì supponì che ses agen success haja cumenzà pir suenter la mort da ses frar. Ma l'exposiziun mussa ch'el ha creà atgnas ovras gia bler pli baud.

Igl è impurtant ch'i n'ha betg num «l'auter Giacometti» u «vè or da la sumbriva».
Autur: Stephan Kunz Directur artistic dal Museum d'art a Cuira

Per l'emprima giada pon vegnir mussadas ovras da l'artist, ch'eran per gronda part nunenconuschentas fin ussa e ch'èn stadas la basa per l'ovra posteriura. Mobiglias ni objects d'endrizzament sco art e buc sco objects dal mintgadi – quella vart vul il directur artistic mussar.

Diego Giacometti: Ovras artisticas

L'exposiziun s'extenda sur tut las duas chasas dal Museum d'art dal Grischun Cuira. En la Villa Planta, la part veglia dal museum, cumparan ils objects en furma da mobigliar en il context da la collecziun grischuna d'art cun per exempel ovras da ses bab Giovanni Giacometti u dal frar Alberto Giacometti. En il tract nov percunter giascha il focus sin il process da las ovras ed i vegnan mussads numerus models da gip e da bronz.

Diego Giacometti: Ina curta biografia

Diego Giacometti è naschì ils 15 da november 1902 a Borgonovo en Bregaglia. Gia sco uffant sa metteva Diego savens en posa per il frar pli vegl Alberto ed al steva model per sias ovras d'art.

Vier Kinder in historischer Kleidung vor einem Holzzaun und Mauer.
Legenda: Ils uffants Giacometti: Diego, Ottilia, Bruno ed Alberto MAD

Suenter lungs viadis è Diego Giacometti ì l'onn 1925 a Paris, nua ch'el è restà tar Alberto e l'ha sustegnì sco assistent. Diego è daventà enconuschent a partir da l'onn 1929 er cun la creaziun da mobiglias. L'emprim ha el fabritgà vasas, lampas u tschiffadas da chamins en gip u bronz, avant ch'el ha cumenzà a partir da l'onn 1950 a sbozzar mobiglias. Suenter curs a l'academia d'art ha el plinavant creà sias emprimas sculpturas d'animals.

Suenter la mort da ses frar l'onn 1966 è Diego sa deditgà dal tuttafatg a sia atgna ovra. L'ultima gronda incumbensa l'ha rendì enconuschent en vasts circuls da la publicitad: la concepziun da l'interiur dal Museum Picasso a Paris. Dad el derivan il mobigliar, las spundas da las stgalas, las ferradiras dals ischs e las glischs dals palantschieus sura. Curt avant l'avertura dal Museum Picasso è Diego Giacometti mort ils 15 da zercladur 1985 a Paris.

Or da l'archiv

L'onn 1988 hai dà l'emprima exposiziun en Svizra davart l'ovra da Diego Giacometti. Il «Telesguard» aveva rapportà.

RTR actualitad 17:00

Artitgels legids il pli savens