Il film documentar «I Giacometti» attira il public svizzer en rotschas en ils kinos. Cun 36'000 visitadras e visitaders èsi il film documentar cun il pli grond success en la rangaziun dal 2023.
Il film «I Giacometti» da l'Engiadinaisa Susanna Fanzun è vegnì en ils kinos ils 19 d'october. Il medem temp mussava il Museum d'art a Cuira, in'exposiziun sur da l'artist Alberto Giacometti. Planisà hajan ins omadus independentamain in da l'auter, han ditg ils curaturs da l'exposiziun. Dentant hajan il museum e la cineasta collavurà temporarmain. Questa coincidenza po avair contribuì al success dal film.
En la Svizra franzosa va il film pir davent dal mars che vegn.
Il film «I Giacometti» ...
... accumpogna ils commembers da la famiglia d’artists Giacometti durant quasi in tschientaner e mussa lur relaziun cun lur patria Bergiaglia – umenzà tar il bab, il pictur Giovanni Giacometti, sur ils figls, il pictur e sculptur Alberto, il sculptur e designer Diego e l’architect Bruno fin tar la figlia Ottilia ch’era cusunza e designera da textilias. Tegnì ensemen ha la famiglia mamma Annetta.
Or da l'archiv:
Il film documentar en Svizra
Vi da l'exempel da «I Giacometti» sa mussa ina giada dapli che la selecziun da films documentars en il kino n’è en nagin auter pajais europeic uschè gronda sco en Svizra, ha ditg Ivo Kummer ch'è schef da film tar l’Uffizi federal da cultura envers Keystone-SDA. Ultra da quai saja l’interess dal public per quest gener en Svizra spezialmain grond.
