Leiko Ikemura è creschida si en il Giapun. L'onn 1972 è ella vegnida en Spagna ed ha studegià pictura. Mo intgins onns pli tard è ella viagiada en Svizra ed ha emprendì d'enconuscher ses um. Tras la maridaglia ha ella survegnì il pass svizzer, ha dentant vivì fin l'onn 2014 en Germania.
L'onn 1989, durant il temp ch'ella viveva en Germania, ha ella dentant passentà in onn en las muntognas grischunas per lavurar. Durant quest temp en il chastè da Fürstenau ha l'artista exequì ina reorientaziun radicala.
Dapi ils onns 1980 perscrutescha Leiko Ikemura temas sco transiziun, interculturalitad, responsabladad collectiva e sexualitad. Ella emancipescha il corp feminin da sia posiziun en l'istorgia ed en la cultura da mainstream, mettend en dumonda convenziuns artisticas ed interrumpend normas socialas.
L'artista ch'è renconuschida sin plaun internaziunal mida senza interrupziun tranter maletgs d'ieli traglischants savens monumentals, dissegns introspectivs ed aquarels, sculpturas da terracotga cun glas, vaider e cheramica.
In motiv central e repetitiv en l'ovra dad Ikemura è il «usagi» giapunais per cunigls, ch'è cumparì per l'emprima giada en si'ovra suenter il terratrembel da Tohoku e l'accident nuclear da Fukushima il 2011, e las mancanzas da naschientscha ch'èn vegnidas annunziadas silsuenter tar animals. Quest mix mitic, che vala sco barun da la «cami» (dieua) unescha ureglias da cunigl cun ina fatscha umana e persunifitgescha suffrir universal, resistenza e renovaziun, entant ch'el metta en dumonda ils ciclus da creaziun e destrucziun.
Las ovras spiritualas che fusiuneschan art oriental ed occidental èn inspiradas da tradiziuns da «Sansuiga» che derivan da l'ost, da maisters vegls giapunais, dal surrealissem, da l'abstracziun dal temp suenter la guerra e da la reanimaziun da la pictura figurativa ils onns 1980.
Il curatur dal Museum d'art dal Grischun è vegnì attent sin l'artista pervia tras ses segiurn. Avant sis onns ha el gì l'idea per in'exposiziun speziala cun ella ed ha cumenzà a retschertgar, organisar e ponderar. Avant quatter onns ha el contactà Leiko Ikemura per l'emprima giada ed è ì a Berlina per l'emprim discurs.
Las incumbensas d'in curatur
In curatur u ina curatura lavura en in museum u in local d'exposiziun ed è responsabel là per la planisaziun da las exposiziuns. Las incumbensas las pli impurtantas èn da tscherner las ovras d'art che duain vegnir mussadas. Il curatur ponderescha exact, tge ovras che sa cunfan, tge istorgia ch'ellas duain raquintar e co che las visitadras ed ils visitaders pon percepir l'art.
Ma i na sa tracta betg mo da tschertgar ovras d'art. In curatur decida era, co che l'exposiziun vegn concepida: Nua exact penda in maletg? Tge colurs han las paraids? En tge glisch duain las sculpturas star? Tut quai gida che l'art ha in effect sin il public.
Per mai è l'emprima e la pli impurtanta incumbensa la tscherna da l'artist u da l'artista. Sch'i reussescha da gudagnar quel u quella, è ina part impurtanta da la lavur gia reussida.
Damian Jurt è curatur dal Museum d'art dal Grischun a Cuira. El ha studegià istorgia d'art e curatura a Genevra, New York e Turitg.
En sias exposiziuns collia el art cun temas da la societad sco la lingua, l'identitad u la natira. Jurt ha lavurà a la Chasa d'art Pasquart a Bienna ed è enconuschent per exposiziuns che animeschan da reflectar – per exempel davart l'agricultura, la lingua u l'appartegnientscha culturala.
Ins po dir: In curatur è sco in reschissur en il teater u tar il film. El na stat betg sez en il center, ma el procura che tut giaja bain ensemen e ch'i resultia in'atmosfera speziala.
Uschia vesa la preparaziun ora
-
Bild 1 von 5. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Suenter l'emprim discurs avant quatter onns ha il curatur Damian Jurt lavurà regularmain cun l'artista. Els dus han studegià, tge exponer e tge raquintar. Per che Leiko Ikemura possia s'imaginar l'exposiziun, ha ella construì in model dal local d'exposiziun. Là ha ella plazzà las differentas ovras ed ha guardà, co las ovras interageschan. Ina chaussa è dentant immediat dada en egl:
Il museum è fitg bel. Ma il spazi è in cubus. Jau vuleva paraids onduladas per midar la dramaturgia dal local.
Il team dal museum ha pia integrà novas paraids, paraids che furman undas. Suenter è l'artista renumada vegnida sezza a Cuira per realisar il model planisà en la realitad. Ensemen cun il curatur Damian Jurt han els declerà a las tecnicistas ed als tecnicists, tge che duai star nua.
L'exposiziun «La mar en las muntognas»
Cun l'exposiziun vuless Leiko Ikemura render attent a las cuntradicziuns. Ella cumbinescha picturas da l'onn 1989 ch'ella ha picturà a Fürstenau cun maletgs dad oz. La finamira è da metter en dumonda cuntradicziuns, sco ch'il num da l'exposiziun «La mar en las muntognas» mussa gia. È la mar propi la pli bassa e la muntogna la pli auta? U n'era pli baud betg dapertut mar?
L'exposiziun cuntegna sculpturas, maletgs, ma er installaziuns da video da Leiko Ikemura. Quellas n'èn dentant betg films registrads, mabain tuttas sa basan sin dissegns. Ikemura s'occupa fitg da la dumonda, sche la pictura exista anc u sch'ella è vegnida antiquada dal film. Cun questas installaziuns vuless ella reunir ils dus mediums en ina nova moda.