cuntegn

Exposiziun en il Museum retic Il stgazi da fotografias da l'Engadin Press è enavos

Autor: Nora Pfister

23.01.2026, 17:53

Cura ch'il directur dal museum retic a Cuira, Guadench Dazzi, ha udì dal return da las 50'000 fotografias en il Grischun, è el immediat stà fieu e flomma.

Ensemen cun la Fundaziun grischuna per la fotografia han el e ses team lura concepì in'exposiziun cun il num «Engadin Press – Invista en l'archiv da fotografias». Quell'exposiziun mussa emprimas impressiuns da la lavur da l'atelier da fotografar engiadinais. Tenor il directur sajan las fotografias in viadi tras il temp e mussian il svilup da l'Engiadina durant ils onns da 1880 fin 1950.

Ins po observar fitg bain il svilup, per exempel co ils mastergns sa midan.

Autur: Guadench Dazzi directur Museum retic a Cuira

Durant ils onns 1960 ha il Museum da communicaziun a Berna survegnì in relasch d'enturn 50'000 fotografias, dias e plattas da vaider da la Stamparia engiadinaisa (Engadin Press).
Durant blers onns è quest relasch ensemen cun in mez milliun auters objects simplamain restà da la vart en il magazin dal Museum da communicaziun a Berna.
L'onn 2019 ha il Museum da communicaziun survegnì l'incumbensa e daners da la Posta e da la Swisscom per in project che prevesa che tut las fotografias da l'inventari dal museum vegnian examinadas, valitadas, cataloghisadas e digitalisadas durant diesch onns.
Durant la emprima fasa dal project ha il museum puspè scuvert il relasch da la Stamparia engiadinaisa e decidì da restituir las fotografias en il Grischun. Per la Fundaziun Grischuna da la fotografia in cas da fortuna, damai ch’i sa tracta bunamain mo d'objects fotografads en il Grischun.
L'archiv da maletgs da la Engadin Press è ina da las pli grondas collecziuns da fotografias istoricas dal Grischun.

Tar l'entira istorgia en detagl.

Ina sfida saja stada d'eruir ils nums da las persunas sin las fotografias u ils lieus illustrads. Qua hajan els gì agid da pliras persunas ch'enconuschan fitg bain l'Engiadina – tranter auter era guids da muntogna. Ma il Museum retic ed era la Fundaziun grischuna per la fotografia n'hajan anc betg tut las infurmaziuns. I fissi flot, sche las visitadras ed ils visitaders identifitgeschan forsa insatgi sin las fotografias ubain era in lieu. Uschia pudessan els ed ellas forsa anc purtar in zic dapli glisch en il stgir. Quai saja per il mument anc in process.