La sanaziun planisada dal Museum da natira a Cuira è vegnida crititgada. Las dimensiuns da quest project paran exageradas ed ins argumentescha ch'il caracter dal bajetg existent na vegn betg considerà avunda. Plinavant vegnia ignorà il context dal quartier circundant, quai che procura per dubis davart l'integraziun dal museum en la vischinanza.
Ludmila Seifert, manadra da fatschenta da l'Uniun per la protecziun da la patria grischuna, ha exprimì sia preoccupaziun davart l'influenza dal project sin l'identitad locala ed il caracter dal quartier. Per Seifert è en emprima lingia l'impurtanza dal bajetg sco ovra architectonica da l'architect Bruno Giacometti da gronda valur.
Bruno Giacometti è il frar da Diego ed Alberto Giacometti. El è naschì ils 24 d'avust 1907 – e mort ils 21 da mars 2012.
El vala sco in dals pli impurtants architects svizzers dal temp suenter la Segunda Guerra mundiala.
Il Museum da natira dal Grischun vala sco in dals pli impurtants bajetgs en l'ovra da Giacometti. Gia l'onn 1939 è el dentant sa participà a la construcziun dal Hallenstadion a Turitg.
I saja in dals fitg paucs bajetgs novs per in museum durant il temp suenter la guerra, quai che haja er ina gronda impurtanza, di ella vinavant. Architectonicamain giaja il bajetg bain a prà cun il maletg da la citad da Cuira.
Ins duai ir enturn bler pli subtil cun quai ch'è avant maun.
Sia tema è ch'il museum perdia la signatura da Giacometti e survegnia ina cumparsa totalmain nova.
Significaziun dal museum e consequenzas da la renovaziun
Entras la renovaziun planisada vegn la cumparsa dal museum a sa midar tenor Andreas Kohne, il manader da l'Uffizi da Construcziun Auta dal Grischun. Per el resta tuttina cler che l'edifizi da Bruno Giacometti è e resta in fitg impurtant edifizi dal chantun.
Il Museum da Natira ha ina rolla centrala per la regiun ed attira ad onn circa 40'000 visitadras e visitaders.
Tenor Kohne sto il bajetg però vegnir sanà perquai che l'edifizi è dapi 44 onns en funcziun e tras quai isà.
Consideraziuns architectonicas e planisaziun futura
Ina cuminanza d'architectura da Turitg ha cun ses project inoltrà pudì persvader il meglier. Tranter auter è previs da construir in plaun supplementar che porscha novas pussaivladads per exposiziuns.
Impressiuns dal project
-
Bild 1 von 4. Bildquelle: Bündner Naturmuseum.
-
Bild 2 von 4. Bildquelle: Bündner Naturmuseum.
-
Bild 3 von 4. Bildquelle: Bündner Naturmuseum.
-
Bild 4 von 4. Bildquelle: Bündner Naturmuseum.
L'Uniun per la protecziun da la patria grischuna na vesa betg la pussaivladad da far recurs cunter il project, ma ha l'intent da lantschar la discussiun davart ils plans. Las decisiuns davart il project vegnan u fatgas a l'urna u lura en il Cussegl grond.
Aspects finanzials e temp da realisaziun
Il Museum da natira a Cuira duess daventar in museum confurm a las pretensiuns actualas. Las lavurs da construcziun èn planisadas da cumenzar l'atun 2028 ed ils custs stimads èn tar 32 milliuns francs.