L'idea da sa fatschentar cun la midada dal clima sco lavur da matura saja naschida or dal sentiment, ch'i na dettia nagut ch'ella sa far cunter quai, raquinta Maya Jäger envers il schurnal regiunal da SRF. Quest sentiment saja vegnì mender cun udir novitads schletas dad inundaziuns, sitgiras u incendis.
Quai haja fatschentà e motivà ella da far insatge encunter, scriva ella en l'introducziun da sia lavur da matura. «Ins sa senta savens sco sch'ins na pudess far nagut – perquai hai jau fatg questa lavur da matura, per che jau haja in bun sentiment», di Maya Jäger.
Ma co è ella insumma stada buna che sia lavur da matura vegn exponida en il museum da la natira dal Grischun? Ella haja simplamain dumandà differents museums, raquinta Maya Jäger.
Ins sa senta savens maladester perquai ch'ins na po betg effectuar bler sco persuna singula – perquai hai jau fatg questa lavur da matura, per savair effectuar insatge.
Ch'il museum da la natira haja a la fin finala dà ses consentiment, haja surtut da far cun il fatg che la lavur da la scolara n'emprovia betg da persvader in'opiniun, di il manader dal museum da la natira Ueli Rehsteiner. La midada dal clima saja in tema cuntravers en la politica, e pervi da quai saja el stà a l'entschatta in pau sceptic. «Jau hai lura dentant vis ch'igl è ina buna contribuziun en connex cun quest tema», di Ueli Rehsteiner.
Per sia lavur da matura haja Maya Jäger l'emprim retschertgà, tge influenza concreta che la midada dal clima ha insumma. «Da quellas hai jau tschernì tschintg che èn restadas endament a mai il pli fitg», declera Maya Jäger. «Lura hai jau retschertgà per chattar persunas en il chantun Grischun che èn pertutgadas.»
Igl èn purtrets nua che glieud descriva sezza tge che las consequenzas da la midada dal clima èn per els – e quellas n'èn betg adina negativas.
Tranter els è er in viticultur da Jenins. A curta vista pudess el profitar da la midada dal clima, ma a lunga vista saja la sitgira e la schelira la primavaira ina gronda sfida. Il pli ferm en memoria saja dentant restada l'istorgia da Roberto Costa a Maya Jäger. El è dapi 21 onns guardiachamona sin la chamona dal CAS sur il glatscher dal Morteratsch. La scolara haja sezza fatg in viadi tar il glatscher ed haja vis quant fitg ch'il glatscher saja gia ì enavos. Ma era quai ch'il guardiachamona haja raquintà ad ella haja fatg impressiun.
El m'ha raquintà da baras che cumparan puspè – baras da persunas ch'èn mortas avant var 50 onns e che vegnan ussa puspè a la glisch perquai ch'il glatsch lieua.
L'exposiziun en il museum da la natira sa cumpona da tschintg differents purtrets da tschintg differentas persunas che vegnan preschentadas sin tschintg placats differents. Tar mintga placat datti in code QR, cun il qual ins po scannar e tadlar tge che las persunas raquintan. Cun sia exposiziun na vul Maya Jäger betg mo mussar differentas istorgias da persunas dal Grischun, mabain er cuntanscher che questas istorgias restian en memoria a la glieud.