Uschia resenta Christian Ruch la relaziun tar il sanctuari da pelegrinadi Santiago de Compostela – suenter avair cuntanschì gia duas giadas la plazza da la catedrala dal sanctuari da son Giachen. Quest onn fa el quint da returnar. La stagiun da pelegrinadi 2025 è uss inaugurada.
La davosa dumengia d’avrigl ha l’Uniun Via da son Giachen Grischun envidà a l’avertura da la stagiun da pelegrinadi, cun in servetsch divin en la claustra da Mustér. Ina gruppa pelegrinas e pelegrins da l’uniun han assistì al servetsch divin celebrà da l'avat Vigeli Monn e ses confrars. Per Christian Ruch è quest act da celebraziun stà in mument emoziunal. «Pelegrinar sur in lung temp è ina gronda sfida corporala e mentala. Sco pelegrin na pon ins betg spetgar davos mintga storta l’illuminaziun. Pelegrinar munta stenta e plaschair, frust e cuntentientscha, lungurella e curturella.»
Jau resent mia vita sco in pelegrinadi cun ses auts e bass, plaschairs, quitads e temas – gist sco en la vita.
Ils davos onns ha l'istoricher e schurnalist liber absolvì 303 kilometers sin duas differentas rutas da pelegrinadi. L’emprima giada ha el fatg ils davos 103 kilometers dal «Camino Inglés». Ils ulteriurs 200 kilometers ha el fatg sin las davosas etappas dal «Camino do Porto». Omaduas giadas è el arrivà tar la catedrala da Santiago de Compostela cun fermas emoziuns. «Igl è in mument incredibel, las persunas vegnan da tut las direcziuns. Tgi bragia, auters chantan da legria, auters crodan per terra da stancladad. Jau hai bargì sco in uffant, pura emoziun» declera il pelegrin.
Durant il «camino» èn tuts e tuttas tuttina, ins ha ils medems problems e las medemas speranzas. Naziunalitad, professiun, stan social – quai na gioga nagina rolla. Questa armonia e pasch tranter pelegrinas e pelegrins, quai spiert da cuminanza è per Christian Ruch in'utopia per ina vita en cuminanza.
Pertge n’èsi betg pussaivel da viver en nossa societad en pasch sco tranter pelegrinas e pelegrins?
La via da son Giachen tras il Grischun n'ha Christian Ruch anc betg absolvì. Quai stettia dentant sin sia glista da pensums. L’Uniun Via da son Giachen Grischun è responsabla che la senda da pelegrinadi che maina tras il chantun Grischun da Müstair, sur Tavau, Cuira, Mustér enfin tar il pass dal Alpsu – saja bain accessibla e bain signalisada. E natiralmain era che pelegrinas e pelegrins survegnian adina il bul per lur pass da pelegrinsla, l'uschenumnada credencial. Plinavant stoppia la pagina d'internet esser actualisada per infurmar pelegrinas e pelegrins.
Impressiuns da pelegrin
-
Bild 1 von 7. Fermas emoziuns cun arrivar tar la catedrala da Santiago. L'onn 2019 ha Christian Ruch realisà sia empermischun ed è chaminà per l'emprima giada: «Jau hai bargì sco in uffant da las emoziuns, cura ch'jau sun arrivà». Bildquelle: Christian Ruch.
-
Bild 2 von 7. Christan Ruch ha dà in pled sin via a pelegrinas e pelegrins. El presidiescha ensemen cun Claudio Föhn dad Arosa l'Uniun Vi da son Giachen Grischun. Bildquelle: RTR.
-
Bild 3 von 7. Vita e cretta ha dastgà accumpagnar Christian Ruch a Mustér. «Jau hai empermess a Dieu, sch'el fa mai saun, lura vom jau il «camino da Santiago», e quai hai jau fatg». Bildquelle: RTR.
-
Bild 4 von 7. Il simbol da pelegrin adina e dapertut. Christian Ruch porta era sin ses grond satgados da pelegrinadi ina conchiglia, il simbol per il pelegrin da Compostela. Bildquelle: RTR.
-
Bild 5 von 7. Pelegrinas e pelegrins da son Giachen. Ina delegaziun da pelegrinas e pelegrins ha assistì a la messa d'inauguraziun da l'onn da pelegrinadi 2025, en la claustra da Mustér. Bildquelle: RTR.
-
Bild 6 von 7. La conchiglia, il simbol per pelegrinas e pelegrins. La conchiglia da son Giachen è dapi il temp medieval in simbol e mussavia per pelegrinas e pelegrins. Bildquelle: RTR.
-
Bild 7 von 7. La claustra da Mustér è ina fermada dal pelegrinadi grischun. La via da son Giachen Grischun cumpiglia 19 etappas. Ella maina da Müstair enfin Sedrun ed al pe dal pass Alpsu. Bildquelle: RTR.