Siglir tar il cuntegn

Header

video
Nossadunna – ina chara amia
Or da Cuntrasts dals 28.05.2023.
laschar ir. Durada: 25 minutas 30 Secundas.
cuntegn

Pelegrinadi svizzer a Lourdes Nossadunna – ina chara amia

Atgnamain èsi in'istoria narra. Ina matta da 14 onns pretenda che Nossadunna saja cumparida ad ella ed haja mussà ina funtauna zuppada. Spert sa derasa la nova che l’aua da questa funtauna fetschia miraclas. Ch’ella fetschia sauns ils malsauns. Quai è stà avant 165 onns.

Dapi lura pelegrineschan mintg’onn milliuns a Lourdes. Jau less savair tge che quest fenomen Lourdes è. Perquai accumpogn jau il Pelegrinadi svizzer ch'ha lieu mintg’onn l’entschatta matg. Mes emprim pelegrinadi.

L'aua da Lourdes – il hit

Per las miraclas da Lourdes duai l’aua esser responsabla. Malgrà ch’igl è cumprovà che quai è aua da baiver tut normala. Sper las staziuns d’emplenir aua da Lourdes èsi perquai savens da star en colonna. Maria Pia Flepp da Cumpadials lavura en ina chasa da tgira. Ella ha empermess als cussadents da prender a chasa per els aua da Lourdes.

Jau crai che quest'aua haja forza da medegiar. Co exact na poss jau betg dir.
Autur: Maria Pia Flepp Cumpadials
Eine Frau füllt Wasser von Lourdes in eine Flasche.
Legenda: Maria Pia Flepp RTR

Viver cardientscha – far dal bun al concarstgaun

Anna Helena Cavelti n’è betg simplamain ina pelegrina. Ella lavura sco voluntaria en l'Accueil nua ch’ils pelegrins che dovran tgira stattan. Anna Helena Cavelti è gia stada var 40 giadas a Lourdes. En ses conturn betg tut che chapescha ch’ins po ir tantas giadas a Lourdes.

Quels tratgan ch'ins vegnia qua e fetschia uraziun davent da la damaun enfin la saira. Gliez na pudess jau gnanc far. Viver cardientscha è per mai era far dal bun al concarstgaun.
Autur: Anna Helena Cavelti Sagogn
Helferinnen in einer Küche in Lourdes.
Legenda: Anna Helena Cavelti RTR

Engraziar a Nossadunna – la chara amia

Ils pelegrins vegnan a Lourdes per rugar tar Nossadunna, per deponer quitads e giavischs. Sin il plaz davant la baselgia dal rusari u davant la renumada grotta da Massabiel pon ins vesair l’entir di gruppas u persunas singulas che fan uraziun e chantan chanzuns da Nossadunna. Mo blers pelegrins vegnan era per engraziar a Nossadunna.

Nossadunna è per mai sco ina amia che dat adina puspè forza. Qua pon ins engraziar ad ella, laschar ir ils patratgs sin tschiel. Trametter ina brev d'amur a questa chara amia Nossadunna.
Autur: Giuanna Capaul Lumbrein
Giuanna Capaul vor der Kathedrale von Lourdes
Legenda: Giuanna Capaul RTR

Pervia da questas ed autras istorgias da Lourdes turnan millis e millis pelegrins mintg’onn a Lourdes. Tenor il moto che jau hai udì pliras giadas durant questa emna da pelegrinadi: U che ti vegns ina giada a Lourdes e mai pli u che ti turnas adina.

RTR Cuntrasts 17:25

Artitgels legids il pli savens