(vallader)
La plü custaivla urazchun es
Scha quel chi sta in schnuoglias
as transfuorma svess
In quai ch’el adura
Quist a prüma vista simpel verset dad Angelus Silesius, ün poet, teolog e meidi dal 17avel tschientiner, descriva fich bain che cha l’urazchiun pudess esser e far cun nus. Scha nus urain, nu vain nus da far bler pleds. Nus nu vain da rovar per quist o per tschai. Nus nu vain dad urar cun impissamaints cumplichats o intelligiaints. Vairamaing vaja per alch tuottafat different.
I va propcha per fich bler. I va nempe per tuot o nüglia. I va per nus svessa, per nossa existenza, per nos esser.
I va propcha per fich bler. I va nempe per tuot o nüglia. I va per nus svessa, per nossa existenza, per nos esser. I va per nossa guarischun. L’urazchun ans po far cler, chi cha nus eschan vairamaing. Che chi’d es nos esser vardaivel. D’ingionder cha nus gnin ed ingio cha nus giain.
L’urazchun ans po manar a chasa. Inavo in quella patria , da la quala nus derivain. In quel lö ingio cha nus simplamaing be eschan. Ingio cha nus nu vain plü quist o tschai. Ingio cha nus nu vulain plü quist o tschai. Ingio cha nus nun eschan plü quist o tschai. Nus eschan simplamaing be amo. Tuot simpel – be esser quia ed uossa.
Ed uschè es nossa transfuormaziun nos retuorn a chasa. Uschè sco cha nus d’eiran fingià adüna maniats. Laschain inavo tuot quai cha nus crajaivan da stuvair per esser in uorden. Laschain ir tuot nossas ideas che cha nus vessan da far per esser avuonda. Laschain ir tuot quai chi’d es amo tanter nus e nus.
Angelus Silesius ha fat e descrit quista experienza. E perquai giavüscha e supplicha el da minchün da nus:
Uman, dvainta essenzial;
Scha’l muond e seis giavüschamaints trapassan
Schi crouda davent tuot la casualità.
Ed i resta inavo be amo l’essenza.
