Siglir tar il cuntegn

Header

audio
Pled sin via
Or da Vita e cretta dals 06.04.2022. Bild: RTR
laschar ir. Durada: 3 minutas 18 Secundas.
cuntegn

Pled sin via Chi es Gesu?

La Dumengia da las palmas esa evidaint: Benedi saja il rai chi vain in nom dal Segner! Pasch in tschêl e gloria in las otezzas! (Lc 19,38) Uschè strasuna tras las giassas a Gerusalem. Üna fuolla as rechatta in extasa, cloms d’algrezcha accumpognan l’introit da Gesu sün ün asen, i aintra il rai chi porta il salüd.

Chi es Gesu? La Dumengia da las palmas paran da s’accumplir las profezias chi prevezzan ün nouv temp da güstia e pasch, d’ün salvader chi volva la sort da tuot ils umans. – Sco cha nus savain, düra quist entusiassem però pac temp. Malapaina schmuntà da l’asenet, as rechattarà Gesu bod sulet, el gnarà sentenzchà ingüstamaing, torturà e miss a mort. Ingio es la fuolla da la Dumengia da las palmas? Quella es bain amo qua, ma da Gesu nu sana plü chi ch’el es. Da pasch e güstia nu’s saja plü nouvas.

La Dumengia da las palmas paran da s’accumplir las profezias chi prevezzan ün nouv temp da güstia e pasch, d’ün salvader chi volva la sort da tuot ils umans.
Autur: Christoph Reutlinger Reverenda en Engiadina

Chi es Gesu? I’ls evangelis ha Gesu bainschi ün grond success cun sias predgias, cun guarischuns e miraculs, el inspirescha a blers umans, vain respettà sco rabbi e maister. Chi ch’el es, quai inclegian però adüna darcheu be singuls. Tü est Cristus, il Figl dal vivaint Dieu! (Mt 16,16) chapischa tuot in üna jada Petrus. O Maria: Schi, Segner, eu craj cha tü est il Messias, il Figl da Dieu, quel chi avaiva da gnir sün quaist muond. (Joan 11,27) Oters vezzan pür cler davo la paschiun da Gesu e la crusch. Uschè il chapitani roman chi conclüda cur cha Gesu es güsta trapassà: Vairamaing, quaist crastian eira il Figl da Dieu! (Mc 15,39)

Chi es Gesu per Els, charas e chars, e chi es Gesu per mai la Dumengia da las palmas 2022? Sco il chapitani roman vivaina eir nus dal temp davo la paschiun da Cristus. Nus savain da sia sort a la crusch. Nus savain da sia resüstanza. Uschè savaina cha seis salüd, cha sia pasch e güstia as muossan güst illa fraischlezza, illa vulnerabilità, illa contestaziun da violenza e crudeltà in quist muond.

Chi es Gesu? L’es quel chi’m lia cun Dieu, güst perche cha’l muond es tal ch’el es. El es quel chi’m driva ils ögls per la dignità da minch’esser uman güst in sia fallibilità. El es quel chi’m revelescha nossa vocaziun in quist muond: e quella resta adonta da la temma l’amur, adonta da la mort la spranza, adonta da la pac derasada incletta da chi cha Gesu es, tant daplü: la cretta.

«Chi es Gesu? L’es quel chi’m lia cun Dieu, güst perche cha’l muond es tal ch’el es.»

Artitgels legids il pli savens

Scrollar a sanestra Scrollar a dretga