Siglir tar il cuntegn

Header

audio
Valladas en flommas: 400 onns suenter Son Fidelis, emissiun entira
Or da Vita e cretta dals 10.04.2022.
laschar ir. Durada: 52 minutas 27 Secundas.
cuntegn

Vita e cretta Valladas en flommas: 400 onns suenter murdraretsch da Son Fidelis

Inimis dad ina giada tanschan il maun – uschia pudessan ins circumscriver la commemoraziun dal Son Fidelis ch’il Partenz planisescha questa stad ensemen cun Feldkirch (A) e Sigmaringen (D). Els vulan regurdar al chaputschin Fidelis da Sigmaringen ch’era vegnì assassinà avant 400 onns a Seewis.

Seewis – Partenz – l’onn 1622: En la vallada èn millis da mercenaris. Ils strategs da Habsburg lessan conquistar il Partenz ed emprovan gist er anc da conquistar las olmas refurmadas, tramettend il frar chaputschin Fidelis a missiunar.

Ina dumengia d'avrigl anno 1622

Dentant – gia sia emprima pregia a Seewis è sia ultima. Fidelis da Sigmaringen, guardian da la claustra da chaputschins a Feldkirch, vegn assassinà gist sut la baselgia. El aveva anc empruvà da fugir. Ma er la schuldada che l'accumpagnava per sia segirtad, n'ha betg pudì salvar el. Ils dal Partenz hajan mazzà er els.

Là, nua ch'el duai esser vegnì per la vita, regorda oz in bigl cun la funtauna a Son Fidelis. Tras sia mort da martir è el vegnì canonisà il 1729 sco emprim chaputschin insumma. Sper sia legenda è er restà ina reliquia dad el: Il chau da Son Fidelis sa chatta anc oz en la Claustra da chaputschins en la citad austriaca Feldkirch.

Valladas grischunas ed austriacas en flommas

Il murdraretsch da Fidelis è capità en il temp da la guerra da 30 onns. Lura eran er las valladas grischunas en flommas. Ils fatgs da quella giada han laschà lur fastizs en la memoria da generaziuns – tant en il Grischun sco er en l'Austria. Perquai saja nairas uras da sa regurdar da Son Fidelis e da quels temps burascus. Quai betg faschond festa, ma sa tanschend il maun e commemorond.

L'onn da e per il Son Fidelis

Ils da Seewis fan quai cun differentas occurrenzas: da la tura scenica tras il vitg fin ad in'exposiziun istorica, ed ina messa da reconciliaziun cun visitas da Feldkirch e Sigmaringen.

Tar la commemoraziun da questa stad ha er il teolog ed istoricher Johannes Flury, oriund da Seewis, gì pled en chapitel. Cun el ha la Vita e cretta fatg ina visita al lieu, nua che la vita terrestra dal chaputschin Fidelis da Sigmaringen ha prendì ina fin andetga.

Vita e cretta 08:00

Artitgels legids il pli savens

Scrollar a sanestra Scrollar a dretga