(sursilvan) Veis Vus gia legiu ni udiu il mandat per Rogaziun Federala? El cantun Grischun publichescha la regenza mintg’onn in messadi a posta per quei di. Igl ein patratgs bein formulai ed actuals. Els lain sentir ch’il di da Rogaziun Federala ei in firau politic-religius.
In patratg central dil messadi ei adina puspei la pasch, era quella denter las differentas religiuns e confessiuns. Uonn p.ex. tematisescha il president dalla regenza, Marcus Caduff, la cultura da cumpromiss e da consens che vala sco model da success en nossa societad.
Tenor Jesus ei urar negina show, mobein relaziun. Negin applaus, mobein silenci. In spazi che envida nus da sesarver per Diu e pil mund.
Il mandat cuntegn in messadi fundau. El cumpeglia treis paginas. In bien ton dapli che in “tweet” sin la plattafuorma X, cun ses maximal 280 segns. Era lezza fuorma vegn duvrada per messadis da presidents. Per haver effect sto in tweet esser empau pli polemics e directs.
280 segns! Dapli spazi dat ei buca per declarar il mund – ni per irritar el. Donald Trump ei staus igl emprem president dils Stadis uni che ha duvrau Twitter resp. X sco instrument da pussonza. Sper ses tweets cun parolas politicas provocontas tarmetta el era regularmein messadis da cuntegn religius. Sco:
“God bless America!”
“In God we trust.”
Ni era “Pray!”.
Trump para da s’exprimer aviartamein davart sia cardientscha. El numna Diu pil num ed appellescha dad urar, aschia sco auters proclameschan programs da partida. Co ein tals messadis veramein da giudicar? Ein els semplamein flosclas ni ina sincera perdetga da cardientscha ni vegn ei fatg politica sin donn e cuost dall’ oraziun?
En quei grau ei Jesus s’exprimius claramein: El priedi sil cuolm ha el detg: “Cu vus ureis, buca fagei sco ils simuladers che uran en la publicitad per vegnir vesi. Cu ti uras, va en tia combra, siara igl esch e roga tiu Bab ch’ei el zuppau” (tenor Mt 6,5-6).
Tenor Jesus ei urar negina show, mobein relaziun. Negin applaus, mobein silenci. In spazi che envida nus da sesarver per Diu e pil mund.
In tweet varga enteifer secundas. In’oraziun resta. Il di da Rogaziun vul regurdar nus che pasch, la tscherca da cumpromiss e da consens sa buca succeder entras 280 segns en las medias socialas. Plitost drova ei 280 segns da fatscha en fatscha.
Jeu giavischel in bi di da Rogaziun Federala e – Dieus protegi la Svizra!
