(sursilvan) Venderdis sera, avon sis jamnas: Jeu erel a casa el marcau vegl da Cuera vid scriver mia lavur da bachelor, ina lavur che drova focus e bia gnarva. En quei mument hai jeu fatg in sbagl. Jeu hai aviert Instagram ed entschiet a scrollar.
«Techno si Laax!», «Bowling e Calanda cun bros!», «Tgi vegn el casino?» – Ina story suenter l’autra ha sclariu il visur da miu handi. Ed jeu? Jeu sun sesius a casa ed hai furschau cul det sin quei visur varga duas, treis uras. Plaids per mia lavur haiel scret negins duront quei temps.
Adina puspei ein damondas vegnidas siado: Munchentel jeu zatgei? Tgei fan pomai mes amitgs en quei mument? Sa sche mes collegas han gest legher senza mei? – X-zacu suenter mesanotg, suenter haver mirau atras gl’entir Instagram e Tiktok, ei finalmein la sien vegnida.
Quei sentiment da tema ch’ins munchenti enzatgei ha in num: FOMO, la scursaniziun englesa che less dir «fear of missing out».
Igl ei buc stau l’emprema gada che quella situaziun ei schabegiada. E probabel sundel jeu buc il sulet che ha quei tal problem. Quei sentiment da tema ch’ins munchenti enzatgei ha in num: FOMO, la scursaniziun englesa che less dir «fear of missing out».
Il plaid ei populars ed ei oravontut vegnius enconuschents tras las medias socialas. Tuts emprovan adina mo da parter ils megliers muments, e da metter lur veta el focus. Clar che nus sedumandein en tals muments: Daco sai jeu buc esser leu, e daco sai jeu buc era guder quei bi mument?
Sco musicist enconusch’jeu quei sentiment fetg bein. Savens hai jeu patratgs sco: «Sch’jeu publicheschel buc gleiti ina nova single sund’jeu buc pli actuals» ni «Sch’jeu sunel buc a quei openair sa quei haver influenza per auters concerts».
Quella FOMO ha denton – e quei ei da menziunar – era purtau massa bials muments en mia veta. Enten esser staus dalla partida a certas occurrenzas, haiel jeu adina bunas historias ed anecdotas cun amitgs ed amitgas. Vitier sundel jeu in fervent fan da nostalgia e raquentel bugen da mias experientschas fatgas.
Culs onns ha quella FOMO adina schau suenter dapli. Jeu hai giu toc per toc dameins il desideri da vuler esser dapertut. Jeu gaudel era ils dis e las seras d’esser persuls. Avon duas jamnas hai jeu priu la decisiun e scret a mes amitgs: «Mei persuls al concert – oz sun jeu buc dalla partida.» Suenter ina, duas beffas ein els i el marcau, ferton ch’jeu hai fatg patgific sil canapè. Negin stress, negin Instagram, negin Whatsapp, negina FOMO. Cun auters plaids: bellezia ruaus.
Quei ei pia stau il cuntrari da FOMO – il schinumnau JOMO, la «Joy of Missing Out», che vul dir: il plascher da BUCA stuer esser dapertut. Dapi quella sera emprovel jeu da tedlar pli fetg sin quei sentiment, enstagl sin quel da stuer esser dapertut. Igl ei in sentiment levgiont.
Miu facit: Mintgaton fa ei bein d’esser offline e da far zatgei mo per sesez: schar il telefonin dalla vart, calar da cumparegliar, sefocussar sigl essenzial – igl ussa. Duront che auters fan storys el www, scriv’jeu mia atgna, senza filters e senza effects artificials.
