Siglir tar il cuntegn

Header

audio
Pled sin via da Stephan Bösiger
Or da Vita e cretta dals 22.05.2022. Maletg: MAD
laschar ir. Durada: 4 minutas 3 Secundas.
cuntegn

Pled sin via La baselgia dess servir als bsögns da la raspada

Dumengia davomezdi sün üna spassegiada da stà. Üna duonna am vegn incunter e nus fermain. «Hoz nu suna statta a predgia, ma eu sun in cas statt’in baselgia. Tü sast, «las baselgias», quel bel löet giò là, suot cumün.» Perche cha quel lö ha nom «las baselgias», quai nu saja, ma id es ün chantun, ingio cha quista duonna po viver sia cretta. Ella nun es nempe areligiusa, ma ella ha tscherchà seis möd persunal per viver sia cretta.

450 ons plü bod i’l listess lö: Sülla senda stretta sur cumün s’inscuntran il ravarenda ed ün hom benestant. Quel deriva dad üna famiglia chi ha da che dir in cumün. Svelt cumainzan üna discussiun ed il tema es cler. La raspada ha gronds plans per refabrichar la baselgia: plü gronda, plü bella, plü adattada a las pretaisas nouvas da la raspada uossa refuormada. I füss da construir üna baselgia degna, da maniera simpla ma i’l stil modern ingio cha tuot il cumün chatta lö. Perquai as prevezza üna grond’empora i’l stil talian; üna chanzla ornada per cha’l pled divin gnia inclet eir i’l ultim chantun, üna acustica chi renda il chant da la raspada in ün gloria divin. Il fabricat nouv vess da rapreschantar l’eternità divina e perdürar tschientiners. Uschè vegn fat giò.

Sco cha las raspadas as müdan, as das-chan eir müdar las baselgias.
Autur: Stephan Bösiger Reverenda

Amo 1200 ons plü bod in üna cità dal imperi roman. Il cristianissem es daspö d’incuort religiun ufficiala ed ils pussants da l’imperi discutan, ingio cha las nouvas raspadas cristianas pudessan s’inscuntrar pel cult divin. Be il meglder es bun avuonda. Salas da bellezza, drizzadas aint cul material il plü prezius, ornadas cun mosaics da splendur chi dessan muossar via sülla splendur dal Segner. Svelt as vegn daperüna: be las salas d’audienza da l’imperatur vegnan in dumonda, las basilicas. In ellas gniva venerà fin d’incuort l’imperatur sco dieu, uossa dess Dieu in Cristus gnir venerà sco imperatur. Uschè ha l’architectura creà ün lö per la preschentscha divina illa raspada.

Hozindi as chatta bod in mincha cumün pro nus üna baselgia. Ella es l’expressiun architecturala da la raspada. Per blers fa’la part da l’istorgia persunala, per oters è’la be amo ün stabilmaint vegl chi ha pers sia funcziun. Sco cha las raspadas as müdan, as das-chan eir müdar las baselgias. Quai es l’occasiun da reponderar l’identità da nossas raspadas e da chattar üna nouva expressiun ill’architectura. Ella nun ha nempe be il scopo dad esser bella, l’architectura dess servir als bsögns da la raspada dad hozindi per ch’ella possa ir vers l’avegnir cun sia spiritualità. Ella es forsa l’expressiun da l’eternità, ma ella nun es eterna. L’architectura as dess müdar sco nossas raspadas. Uschè restan vivs, ils stabilmaints e las baselgias. Bella dumengia.

RTR Vita e Cretta 08:00

Artitgels legids il pli savens