(sursilvan) Naven dil marcau da Kinneret, in anteriur liug biblic en tiara sontga, gaud’ins ina biala survesta sur il lag Genesaret, la planira da Tabga ed il cuolm, nua che Jesus ha fatg siu renomau «priedi sil cuolm». Quei liug regorda dapi tschentaners alla multiplicaziun dils pauns. Il liug nua ch’el ha saviu dustar la fom a tut ils presents. Quella historia finescha che la glieud serimnada vuleva far ord Jesus in retg, mo el sez ha refusau ed ei seretratgs el desiert.
In dils motivs sa esser, che buc el sez vuleva esser in retg, mobein el vuleva dar anavos a tuts carstgauns lur dignitad humana, roiala, culla quala Diu ha scaffiu tuts carstgauns.
En differents texts dalla scartira, oravontut tiel process da Jesus avon Pilatus, vegn Jesus numnaus retg. Il retg dils gedius. Ils texts dalla bibla sco era Jesus sez fan denton clar a nus: El ei buc in retg, silmeins buc in sco ei spitgavan dad el.
In dils motivs sa esser, che buc el sez vuleva esser in retg, mobein el vuleva dar anavos a tuts carstgauns lur dignitad humana, roiala, culla quala Diu ha scaffiu tuts carstgauns.
Jesus ha cun ses exempels forsa vuliu dar a nus la schanza da capir nossa dignitad humana, gie roiala. Aschia stat ei era scret el Niev Testament: El ha fatg nus retgs per nies Diu.
Mo a biars carstgauns vegni priu lur dignitad, gie magari schizun il pli grond scazi, numnadamein lur veta. Auters piteschan da discriminaziuns, vegnan sclaus ora ni vulnerai en lur dretgs. Ad els, oravontut als cristians discriminai e persequitai, haiel giu il privilegi da dar ina vusch entras miu engaschi professional.
Per concluder lessel denton turnar anavos sin in ulteriur aspect: numnadamein sigl usit dils treis sogns retgs. Quels sabis digl Orient ch’han purtau entscheins, aur e mirra, han fascinau mei gia sco dunna giuvna. Ed jeu sedamondel: Sin tgei scazis astgein nus selegrar entrond inagada en siu reginavel. In patratg che ha senz’auter sia fascinaziun.
