(sursilvan) La 40avla ediziun digl Open Air Lumnezia ei historia! – Era sche quei festival da musica ei dapi in pèr dis a fin, dat ei aunc ussa enzatgei che regorda mei bia a quei eveniment: numnadamein mes calzers da viandar! Mintga gada che jeu mon sin nies balcun, vesel jeu quels calzers plein lozza che duvrassen urgentamein ina schubergiada intensiva.
Era sche Vus, caras lecturas e cars lecturs, essas forsa buca stai agl open air, veis Vus segir viu ils maletgs ellas gasettas ni silla pagina d’internet dad RTR: schliat’aura e garniala, igl areal da festival plein buglia ed ils visitaders cun stivlas da gumma e pelerinas.
Quels maletgs vevel jeu era viu avon che nus essan i sonda suentermiezdi en direcziun da Degen. – E per dir ei empau diplomatic: jeu vevel buca grond tschaffen dad ir cun caultschas liungas, ina giacca da plievgia e calzers aults ad in open air e quei da mesa stad!
Muments da ventira vegnan bia surprendentamein e bia era en situaziuns nunperfetgas, perfin sch’ins stat culs peis ella lozza ad in concert ad in open air!
Era sche l’aura ei buca semidada quella sonda ed ei pluschignava adina puspei, deva ei lu tuttina «muments da sulegl» per mei, sco per exempel l’atmosfera pascheivla, mellis da persunas cun buna luna e che gudevan ils concerts. E tut quei ha era fatg enzatgei cun mei; numnadamein ch’ei ha dau muments, nua che jeu hai emblidau che jeu stevel gl’entir temps cun omisdus peis ella lozza.
Quella situaziun ha lu enzacu era regurdau mei ad in psalm biblic. El psalm 40 engrazia e lauda il psalmist Diu ch’el hagi gidau el en in mument grev ed hagi buca emblidau el. El descriva quei cun il maletg che Dieus hagi tratg el ord «lozza e miarda». – E quei ei enzatgei tipic biblic: experientschas divinas vegnan bia surprendentas ed en muments nua ch’il carstgaun ei propi ella buglia.
E forsa eis ei culla ventira empau il medem: la ventira san ins buca planisar; muments da ventira vegnan bia surprendentamein e bia era en situaziuns nunperfetgas, perfin sch’ins stat culs peis ella lozza ad in concert ad in open air!
Era sche jeu fetschel ei nuidis, ha ei USSA num da schubergiar ils calzers da viandar, aschia che quels ein promts per la proxima aventura … Ni stuess jeu ussa forsa dir: per la proxima ventira?
