Il temps da Nadal sauda tiel vargau. Las reclamas penetrontas fan plaz a quellas cun rabats specials. Il pigniel da Nadal cun tut sia decoraziun ei dustaus. Las glischs che han sclariu bia casas stizzadas. Forsa che la stalla stat aunc sco tier mei en stiva. Uonn ein mes retgs vegni per suenter Daniev tier Jesus il Bambin. Jeu hai buca giu plaz per els. Ed ussa stattan ei cheu, bials, pompus e portan ils schenghetgs – aur, entscheins e mirra. E gest cun quels schenghetgs lein nus sefatschentar in mumentet:
Aur- mintgin da nus seregroda dils giugs olimpics. Leu survegnan ils megliers atlets ina medaglia d’aur. Co quels tarlischan ed ein cuntents. Quella medaglia munta ti eis buns, il meglier. Ti eis zatgi impurtont, tut fa stem da tei.
La medema muntada ha igl aur, ch’ils retgs ni sabis han purtau a Jesus, giu. Ed a nus vul Dieus dir: Jeu hai scaffiu tei tenor mia semeglia – ti eis buns, impurtonts gest sco ti eis. Ti eis custeivels sco gl’aur.
Pia schai ei en nos mauns e nossas buccas da midar enzatgei.
Il secund schenghetg, entscheins. Buca tuts han bugen il fried da fiastas en baselgia. Tuttina s’auda il fem ed il bien fried da rascha tier bia culturas e tradiziuns. Entras il fem ed il fried essan nus colligiai in cun l’auter. Malgrad distanza essan nus ina cuminonza. Tgei bi patratg, el temps dad uss.
Ed era il tierz schenghetg, la mirra, ha ina biala muntada. Mirra ei era rascha, mo ella vegn buca barschada: Ins fa etg ord dad ella. Etg che migliura las plagas. Etg che fa bein, che muossa a nus che nus vegnin carezai. Aschia dat ei nova speronza – tut vegn bien.
Gest quella speronza ei tenor mei aschi impurtonta en nies temps dad oz. Speronza che survarga cunfins. Speronza che duei vegnir purtada lunsch viado el mund.
Jeu hai giu grond plascher d’entupar questa jamna retgs e reginas che han purtau: legria, cuminonza e speronza els quartiers da bia vitgs. Affons che han mess a disposizun lur temps liber per cantar e purtar benedicziun als convischins. In pign mument normalitad, ina pintga sentupada, far dil bien e parter culs auters. In bi mument commuentont.
E tgei resta uss da tut quels sentiments suenter Nadal?
Spontan vegnan endamen a mi ils plaids da Jesus ord igl Evangeli: «Quei che vus fageis al pli pign da mes frars veis vus fatg a mi!» Pia schai ei en nos mauns e nossas buccas da midar enzatgei. Ils retgs han purtau benedicziun – bene dire – bien plaid. Nus savein cun buns plaids, cun viver mudest, cun ponderar bein tgei che nus duvrein, haver in buna relaziun cun nies ambient ed haver quitau dad el. Viver cul patratg che nies mund ei buca nies possess. Nus vein el ad emprest e benedicziun munta che mintgin ha il dretg da viver en in mund saun e gest. Pia seglia sur l’atgn’umbriva – ei schai en nos mauns ed il temps da Nadal cuozza pli ditg che mo entgins dis ad onn.
